ბრაზილიამ გაეროში დევნილთა შესახებ რეზოლუციაზე თავი შეიკავა, თუმცა საქართველოს ტერიტორიულ მთლიანობას მხარი დაუჭირა

გაერთიანებული ერების ორგანიზაციაში ბრაზილიის მისიის წარმომადგენელმა განმარტა ქვეყნის პოზიცია იმ რეზოლუციასთან დაკავშირებით, რომელიც საქართველოში იძულებით გადაადგილებულ პირებსა და ლტოლვილებს ეხება.

კენჭისყრისას ბრაზილიამ თავი შეიკავა, თუმცა სესიის მსვლელობისას გაკეთებულ განცხადებაში ხაზგასმით აღინიშნა, რომ ქვეყანა მტკიცედ უჭერს მხარს საქართველოს სუვერენიტეტსა და საერთაშორისო სამართლის პრინციპებს.

„ბრაზილიამ თავი შეიკავა იმ რეზოლუციასთან დაკავშირებით, რომელიც ეხება საქართველოში იძულებით გადაადგილებულ პირებსა და ლტოლვილებს. მიუხედავად იმისა, რომ ჩვენ კვლავაც სრულად ვუჭერთ მხარს ჟენევის საერთაშორისო დისკუსიებს, როგორც ძირითად ფორმატს პოლიტიკური და ჰუმანიტარული საკითხების განსახილველად, ღრმა მწუხარებას გამოვთქვამთ მოლაპარაკებების რიგ რაუნდებში არსებითი პროგრესის არარსებობის გამო.

ამ დისკუსიების მარგინალიზაცია და ზოგიერთი მხარის მონაწილეობაზე უარი, ძირს უთხრის ნდობას კონკრეტული პროგრესის მიღწევის შესაძლებლობისადმი, მიუხედავად გაეროს, ეუთოსა და ევროკავშირის მხრიდან მედიაციის მიმართულებით გაწეული მუდმივი ძალისხმევისა. უკიდურესად მნიშვნელოვანია, რომ ჰუმანიტარული წუხილები საერთაშორისო ძალისხმევის ცენტრში დარჩეს.

კერძოდ, ჩვენ შევახსენებთ ყველას, რომ საერთაშორისო ჰუმანიტარული სამართალი, მათ შორის ჟენევის მეოთხე კონვენცია და 1977 წლის პირველი დამატებითი ოქმი, განსაზღვრავენ მშვიდობიანი მოსახლეობისა და გადაადგილებული პირების დაცვის ძირითად პარამეტრებს, რაც მოიცავს დევნილებისა და ლტოლვილების უფლებას, ნებაყოფლობით, ღირსეულად და უსაფრთხოდ დაბრუნდნენ თავიანთი წარმოშობის ადგილებზე, როდესაც ეს ფიზიკური უსაფრთხოების თვალსაზრისით შესაძლებელი იქნება.

ამასთან დაკავშირებით, ჩვენ ვადასტურებთ ჩვენს სოლიდარობას ნებისმიერი კონფლიქტით დაზარალებული დევნილებისა და ლტოლვილების მიმართ და ხაზს ვუსვამთ საერთაშორისო სამართალზე, დიალოგსა და ნდობის აღდგენის ღონისძიებებზე დაფუძნებული მყარი გადაწყვეტილებების შემუშავების აუცილებლობას, ლტოლვილთა ინტერესების მკაცრი დაცვით.

ბრაზილია კვლავაც გააგრძელებს იმ საერთაშორისო ძალისხმევის მხარდაჭერას, რომელიც მიმართულია მოლაპარაკებების გზით გრძელვადიანი, მშვიდობიანი გადაწყვეტის ხელშეწყობისკენ, რაც შესაძლებელს გახდის დაზარალებული მოსახლეობის ჰუმანიტარული საჭიროებების დაკმაყოფილებას და წვლილს შეიტანს რეგიონულ სტაბილურობაში.

ჩვენ ვადასტურებთ ბრაზილიის ურყევ მხარდაჭერას საქართველოს სუვერენიტეტის, დამოუკიდებლობისა და ტერიტორიული მთლიანობისადმი მის საერთაშორისოდ აღიარებულ საზღვრებში“, - აღნიშნა მან.