ბრიტანეთის თავდაცვის სამინისტრომ ლა-მანშის სრუტეში ბრიტანეთის დროშის ქვეშ მცურავ იახტასა და რუსულ სამხედრო ხომალდს შორის მომხდარ ინციდენტთან დაკავშირებით დეტალები გაასაჯაროვა - უწყების განცხადებით, სამხედრო ხომალდს იახტის მიმართულებით არ უსვრია

დიდი ბრიტანეთის თავდაცვის სამინისტრომ ლა-მანშის სრუტეში ბრიტანეთის დროშის ქვეშ მცურავ იახტასა და რუსულ სამხედრო ხომალდს შორის მომხდარ ინციდენტთან დაკავშირებით ახალი დეტალები გაასაჯაროვა. უწყების განცხადებით, გამაფრთხილებელი გასროლები უშუალოდ იახტის მიმართულებით არ იყო მიმართული.

ლონდონის შეფასებით, რუსული ფრეგატი „ადმირალი გრიგოროვიჩი“ ინციდენტის დროს, სავარაუდოდ, ცდილობდა რეგიონში მყოფი სხვა გემებისთვის ეჩვენებინა, რომ ის დრეიფში იმყოფებოდა და საკუთარი ძრავის სიმძლავრით არ მანევრირებდა.

სწორედ ამ მდგომარეობამ, შესაძლოა, რუსული ხომალდის ეკიპაჟს თავი უფრო მოწყვლადად აგრძნობინა, რამაც საბოლოოდ გამაფრთხილებელი გასროლის გადაწყვეტილებამდე მიიყვანა.

ბრიტანული მხარის ინფორმაციით, გასროლები განხორციელდა ცეცხლსასროლი იარაღიდან ცალკეული ტყვიებით და მას ავტომატური ჯერის ხასიათი არ ჰქონია.

დიდი ბრიტანეთის თავდაცვის სამინისტროს ოფიციალურმა წარმომადგენელმა განაცხადა: „ბრიტანულ გემთან რადიოკავშირის დამყარების მცდელობის შემდეგ, ფრეგატმა „გრიგოროვიჩმა“ გამაფრთხილებელი ცეცხლი გახსნა. ეს გასროლები არ იყო მიმართული უშუალოდ იახტისკენ და წარმოადგენდა შესაძლო შეჯახების თავიდან აცილების მცდელობას. ჩვენი შეფასებით, ეს არის იზოლირებული ინციდენტი და იგი არანაირად არ უკავშირდება გასულ უქმეებზე დიდი ბრიტანეთის მიერ გემ „სმირტოსის“ დაკავების ფაქტს. სამეფო ფლოტის ხომალდი HMS Mersey უწყვეტ რეჟიმში აწარმოებდა რუსული გემის მონიტორინგს, ხოლო იახტის ეკიპაჟს უკვე გაეწია შესაბამისი დახმარება“.