ბრიტანეთში 18 წლის მოზარდის მკვლელობის გამო გამართული საპროტესტო აქცია პოლიციასთან შეტაკებებით დასრულდა

დიდი ბრიტანეთის ქალაქ საუთჰემპტონში 18 წლის ჰენრი ნოვაკის მკვლელობის გამო გამართული საპროტესტო აქცია პოლიციასთან შეტაკებებით დასრულდა. ინფორმაციას Sky News-ი ავრცელებს.

ბრიტანული ტელეარხის ცნობით, ათასობით ადამიანი ქალაქის ქუჩებში გამოვიდა, რათა ჰენრი ნოვაკის მკვლელობა გაეპროტესტებინა. მოგვიანებით მიტინგი პოლიციასთან შეტაკებაში გადაიზარდა. მომიტინგეები სამართალდამცველებს ბოთლებს, ფოიერვერკებსა და სხვა ნივთებს ესროდნენ.

ინციდენტის შედეგად სამართალდამცველებმა ორი ადამიანი დააკავეს - ერთი პოლიციელზე თავდასხმისთვის, ხოლო მეორე იარაღის უკანონო შეძენა-შენახვა-ტარებისთვის.

ბრიტანეთის ხელისუფლების წარმომადგენლები არ გამორიცხავენ, რომ დაკავებულთა რიცხვი, შესაძლოა, გაიზარდოს.

ჰენრი ნოვაკი 2025 წლის 4 დეკემბერს საუთჰემპტონში მოკლეს. მას 23 წლის მამაკაცმა დანით რამდენიმე სასიკვდილო ჭრილობა მიაყენა. ადგილზე მოსულმა პოლიციამ ჩათვალა, რომ ინციდენტში დამნაშავე ნოვაკი იყო და ჯერ კიდევ ცოცხალ ადამიანს ბორკილები დაადო. დაჭრილი ნოვაკი პოლიციელებს ეუბნებოდა, რომ ვეღარ სუნთქავდა, თუმცა სამართალდამცველებმა მას არ დაუჯერეს. მოზარდი ძლიერი სისხლდენის შედეგად გარდაიცვალა.