CENTCOM-ი ირანზე განხორციელებული დარტყმების შესახებ იუწყება

აშშ-ის შეიარაღებული ძალების ცენტრალური სარდლობის (CENTCOM) ინფორმაციით, ამერიკელმა სამხედროებმა გვიან ღამით ირანის წინააღმდეგ დარტყმების კიდევ ერთი სერია დაასრულეს.

ამერიკულმა ძალებმა იერიში მიიტანეს ირანის სამხედრო ობიექტებზე, მათ შორის საზღვაო სამიზნეებზე, რაკეტებისა და დრონების საცავებზე, სანაპირო სათვალთვალო პოზიციებსა და საჰაერო თავდაცვის საშუალებებზე.

CENTCOM-ის განცხადებით, აღნიშნული დარტყმები კიდევ უფრო ასუსტებს ირანის შესაძლებლობას, თავს დაესხას მეზღვაურებსა და კომერციულ გემებს.

მიმდინარე თვეში აშშ-ის ძალებმა ირანის ტერიტორიაზე ათობით სამხედრო ობიექტი დაბომბეს, პარალელურად კი ზღვაზე ირანის ბლოკადა განაახლეს.

CENTCOM-ის ინფორმაციით, ამ დროისთვის ამერიკელმა სამხედროებმა ცხრა კომერციულ ხომალდს ირანის პორტებისკენ ან იქიდან გადაადგილების მარშრუტი შეუცვალეს, ხოლო ერთი ხომალდი მწყობრიდან გამოიყვანეს, რათა გემებისთვის ისლამური რესპუბლიკის პორტებში შესვლა ან მათი დატოვება აღეკვეთათ.

ამჟამად ახლო აღმოსავლეთში 50 000-ზე მეტი ამერიკელი სამხედროა განლაგებული. CENTCOM-ის განცხადებით, ისინი მაღალი საბრძოლო მზადყოფნის რეჟიმში იმყოფებიან და მზად არიან ნებისმიერი მისიის შესასრულებლად.