დავით ჩიხელიძე: ევროპის ლიდერებს შეშფოთების მიზეზი ნამდვილად აქვთ, რადგან ისინი ყველაფერს აკეთებენ უკრაინის კონფლიქტის გაგრძელებისთვის და არა მისი დასრულებისთვის. ფაქტობრივად, ევროკავშირი უკრაინელი ხალხის მკვლელობის გაგრძელებას აფინანსებს

ექსპერტი, დავით ჩიხელიძე სოციალურ ქსელში გამოცემა „პოლიტიკოს“ მიერ გავრცელებულ ინფორმაციას ეხმიანება, რომლის მიხედვითაც, ირანის კონფლიქტის მოგვარების შემდეგ აშშ-ის პრეზიდენტი დონალდ ტრამპი შესაძლოა უკრაინის საკითხს დაუბრუნდეს, რაც, ევროპელი ლიდერების შეშფოთებას იწვევს.

როგორც ჩიხელიძე აღნიშნავს, ევროკავშირის მიერ რუსეთის წინააღმდეგ დაწესებულმა სანქციებმა მოსალოდნელი შედეგი ვერ გამოიღო, ხოლო უკრაინისთვის გაწეული ფინანსური და სამხედრო დახმარება, ომის გაგრძელებას უწყობს ხელს.

„პოლიტიკო“ წერს, რომ ირანის კონფლიქტის მოგვარების შემდეგ, ტრამპი შესაძლოა უკრაინის საკითხს დაუბრუნდეს, რაც ევროპელი ლიდერების შეშფოთებას იწვევს. ევროპის ლიდერებს შეშფოთების მიზეზი ნამდვილად აქვთ, რადგან ისინი ყველაფერს აკეთებენ უკრაინის კონფლიქტის გაგრძელებისთვის და არა მისი დასრულებისთვის. ფაქტობრივად, ევროკავშირი უკრაინელი ხალხის მკვლელობის გაგრძელებას აფინანსებს, მათი გადადგმული ნაბიჯები სიტუაციის ესკალაციას ემსახურება და არა ლოკალიზაციასა და შეთანხმების მიღწევას.

ევროკავშირი რუსეთის წინააღმდეგ აწესებს სანქციებს, რომლებიც, რბილად რომ ვთქვათ, ისე არ მუშაობს, როგორც მოლოდინი იყო. მეორე მხრივ, უკრაინას აძლევს ფინანსურ და სამხედრო რესურსს, რათა ომი გაგრძელდეს და ფაქტობრივად ნაბიჯსაც არ დგამს ზავისთვის. უნდა აღინიშნოს, რომ ფინანსური დახმარების ნაწილი კრედიტია და არა საჩუქარი, რომლის გადახდაც უკრაინას შემდგომ წლებში მოუწევს.

თავის მხრივ, ტრამპი ნამდვილად იმედგაცრუებულია ევროპით, რადგან ირანის კონფლიქტის დროს ევროპა ამერიკის მოკავშირე არ აღმოჩნდა. პირიქით, მან ტრამპს დახმარებაზე უარი განუცხადა (სწორი იყო ევროპის პოზიცია თუ არასწორი, ეს სხვა წერილის თემაა). შესაბამისად, ევროპაზე გაბრაზებული ტრამპი ყველაფერს გააკეთებს, რათა ევროპაზე დომინაცია მოიპოვოს და ევროპული ქვეყნების როლი კიდევ უფრო შეამციროს, მათ შორის ეკონომიკური და პოლიტიკური კუთხით.