უკრაინამ რუსეთის სამხედრო-სამრეწველო, ნავთობგადამმუშავებელ და ლოგისტიკურ ობიექტებს დაარტყა

11-12 სექტემბერს უკრაინის თავდაცვის ძალებმა რუსეთის ტერიტორიის სიღრმეში მასშტაბური და კოორდინირებული იერიშების სერია განახორციელეს.

kyivindependent-ის ინფორმაციით, შორი მოქმედების უპილოტო საფრენი აპარატებითა და ახალი ფრთოსანი რაკეტებით განხორციელებული თავდასხმების სამიზნე რუსეთის სამხედრო-სამრეწველო კომპლექსი, სარაკეტო საწვავის მწარმოებელი საწარმოები, ნავთობგადამმუშავებელი სიმძლავრეები და საკვანძო ლოგისტიკური ცენტრები გახდა.

12 სექტემბრის ღამეს უკრაინულმა შორი მოქმედების დრონებმა საზღვრიდან დაახლოებით 900 კილომეტრის დაშორებით, სამარის ოლქის ქალაქ ტოლიატიში მდებარე ქარხანა "ტოლიატიკაუჩუკზე" მიიტანეს იერიში. დარტყმის შედეგად საწარმოს ტერიტორიაზე მასშტაბური ხანძარი გაჩნდა. უკრაინის გენშტაბის ცნობით, აღნიშნული ქარხანა აწარმოებს სინთეტიკურ კაუჩუკს, მონომერებსა და მაღალოქტანური ბენზინის დანამატებს, რაც პირდაპირ გამოიყენება ტაქტიკური და ბალისტიკური რაკეტებისთვის განკუთვნილი მყარი საწვავის დასამზადებლად.

იმავე ღამეს დრონებით იერიში განხორციელდა როსტოვის ოლქის ქალაქ ტაგანროგზეც, სადაც ადგილობრივების ცნობებითა და NASA-ს ხანძრების მონიტორინგის სისტემის მონაცემებით, ცეცხლი გაუჩნდა საავტომობილო ქარხანასა და სამხედრო აეროდრომის მიმდებარე ტერიტორიას.

აღნიშნულ თავდასხმებს წინ უძღოდა 11 სექტემბრის მასშტაბური დარტყმები. უკრაინულმა მხარემ ვოლგოგრადის სამხედრო-სამრეწველო ობიექტებზე იერიში ახალი მძიმე ფრთოსანი რაკეტით - FP-5 "ფლამინგოთი" (Flamingo) მიიტანა, რამაც ადგილზე ძლიერი ხანძარი გამოიწვია. ობიექტი, რომელსაც რაკეტა მოხვდა, სავარაუდოდ სანქცირებული ქიმიური საწარმო "ვოლგოგრადპრომპროექტია", რომელიც რაკეტების მყარი საწვავის წვის კატალიზატორებსა და თავდაცვითი დანიშნულების ნივთიერებებს აწარმოებს.

იმავე ღამეს უკრაინულმა დრონებმა ქალაქ სარატოვში ორ მსხვილ ობიექტს დაარტყეს. იერიში განხორციელდა კომპანია "როსნეფტის" კუთვნილ ნავთობგადამმუშავებელ ქარხანაზე, რომლის წლიური სიმძლავრეც 4.8 მილიონ ტონა ნედლ ნავთობს შეადგენს.

პარალელურად, უკრაინული წარმოების FP-1 დრონებით მთლიანად განადგურდა რუსული ონლაინ-გიგანტის, Ozon-ის 100 000 კვადრატული მეტრის ფართობის ლოგისტიკური ჰაბი - სატელიტური ფოტოებით დადასტურდა, რომ დამწვარია 85 000 კვადრატულ მეტრზე მეტი ფართობი და განადგურებულია 30 მილიონზე მეტი ერთეული პროდუქცია.

გარდა ამისა, 11 სექტემბერს აფეთქებების ხმა ისმოდა დაღესტნის საპორტო ქალაქ კასპიისკშიც. პრეზიდენტმა ვოლოდიმირ ზელენსკიმ დაადასტურა დარტყმების წარმატება და განაცხადა, რომ უკრაინულმა ძალებმა მიზნებს მიაღწიეს შავ ზღვაში, დაღესტანში, უდმურტიაში, ასევე ტულის, ნიჟნი ნოვგოროდის, პერმისა და სამარის ოლქებში.

კიევის შორი მოქმედების იერიშების კამპანია რუსეთის ენერგეტიკული შემოსავლების შემცირებასა და საოკუპაციო არმიის მომარაგების ჯაჭვის პარალიზებას ისახავს მიზნად.