ევროკომისიამ უკრაინის თავდაცვისთვის დამატებით €6.1 მილიარდი დაამტკიცა

ევროკომისიამ უკრაინისთვის დამატებით €6.1 მილიარდის გამოყოფა დაამტკიცა. თანხა უკრაინისთვის საჰაერო და სარაკეტო თავდაცვის სისტემების, საბრძოლო მასალის, დრონებისა და ელექტრონული ბრძოლის საშუალებების შესაძენად იქნება გამოყენებული.

ევროკომისიის პრეზიდენტის, ურსულა ფონ დერ ლაიენის განცხადებით, დაფინანსება უკრაინას საშუალებას მისცემს, მათ შორის, „პატრიოტის“ სისტემებისთვის PAC-3 ტიპის რაკეტები შეიძინოს და რუსეთის სარაკეტო და დრონებით თავდასხმებისგან უკეთ დაიცვას ცა.

ევროკომისიის ცნობით, თანხა როგორც ევროპული, ისე უკრაინული კომპანიებისგან თავდაცვითი პროდუქციის შესყიდვას მოხმარდება. 2026 წელს უკრაინის თავდაცვისთვის გათვალისწინებული €28.3 მილიარდი უკვე სრულად არის განაწილებული.

ევროკომისიის განცხადებით, უკრაინას მიმდინარე წელს თავდაცვის მიმართულებით უკვე €8.35 მილიარდი აქვს გადარიცხული.