დავით მათიკაშვილი: ოპოზიციას არანაირი უნარი არ გააჩნია, რაიმე სოლიდური შექმნას. ეს არის ძირითადი მიზეზი იმისა, თუ რატომ უპირისპირდებიან ერთმანეთს

დავით მათიკაშვილი თამარ ჩერგოლეიშვილისა და ანა წითლიძის დაპირისპირებას ეხმაურება. საპროცედურო საკითხთა და წესების საპარლამენტო კომიტეტის თავმჯდომარე მიიჩნევს, რომ დაპირისპირება იმით არის გამოწვეული, რომ ოპოზიციას საზოგადოების მხარდაჭერის მოპოვების უნარი არ გააჩნია.

„ოპოზიციას არანაირი უნარი არ გააჩნია, რაიმე სოლიდური შექმნას. უსუსურობა და უნიათობა, საზოგადოების მხარდაჭერის მოპოვების შეუძლებლობა არის ძირითადი მიზეზი იმისა, თუ რატომ უპირისპირდებიან ერთმანეთს, იშვერენ თითს, ისმის ლანძღვა-გინება. საბოლოო ჯამში, კიდევ ერთხელ შემიძლია გავუსვა ხაზი იმას, რომ ეს არის ძალიან კარგი ჩვენი საზოგადოებისთვის, რამეთუ საბოლოოდ დარწმუნდნენ იმაში, რომ წარმოუდგენელია დაბრუნდეს „მეხუთე კოლონა“ და მოხდეს კოლექტიური „ნაცმოძრაობის“ რევანში. ამბიციები კი დიდი აქვთ, მაგრამ ამ ამბიციებს არანაირი პრაქტიკული საფუძველი არ გააჩნია“, - მიიჩნევს მათიკაშვილი.

ანა წითლიძე ამტკიცებს, რომ ნიკა გვარამიამ თანამებრძოლებს მძიმე მომენტში უღალატა. ასევე იხსენებს, რომ წარსულში გვარამია ჩერგოლეიშვილს დასცინოდა. თამარ ჩერგოლეიშვილმა კი სააკაშვილსა და ნაციონალურ მოძრაობას შეურაცხყოფა მიაყენა.