Der Spiegel: გერმანიაში გაუსაძლისი სიცხის მიუხედავად, ქალაქ დორტმუნდის ხელისუფლებამ მეტროს ახალი ვაგონები კონდიციონერების გარეშე შეუკვეთა

გერმანიის ქალაქ დორტმუნდის საზოგადოებრივი ტრანსპორტის კომპანიამ DSW21-მა შეგნებულად თქვა უარი კონდიციონერების დაყენებაზე მეტროს ახალი ვაგონების შეკვეთისას. ინფორმაციას Der Spiegel-ი ავრცელებს.

გამოცემის ცნობით, ვაგონებში კონდიციონერების დაყენება დამატებით 70 მილიონი ევრო დაჯდებოდა. როგორც სატრანსპორტო კომპანიაში განაცხადეს, აღნიშნული თანხა უმჯობესი იქნება, რომ სხვა სატრანსპორტო საშუალებებზე დაიხარჯოს.

გარდა ამისა, როგორც დორტმუნდის სატრანსპორტო კომპანიაში განმარტეს, კონდიციონერების არ დაყენება ქალაქს წელიწადში დაახლოებით7 მილიონი კილოვატ-საათის ელექტროენერგიის დაზოგვის საშუალებას მისცემს, რაც დაახლოებით 2 ათასი შინამეურნეობის მიერ დახარჯული ელექტროენერგიის ეკვივალენტია.

კონდიციონერების დაყენებაზე უარის თქმამ მოქალაქეებში გაურკვევლობა გამოიწვია. ახალი მატარებლების ერთ-ერთმა მომხმარებელმა განაცხადა: „ფული ყველაფრისთვის მოიძებნება, მაგრამ არა ამისთვის. არ ვთვლი, რომ ეს სწორი გადაწყვეტილებაა“.

სატრანსპორტო კომპანიის ხელმძღვანელობამ აღიარა, რომ ზაფხულის ცხელ დღეებში კონდიციონერის გარეშე მგზავრობა „არაკომფორტულია“, თუმცა დასძინა, რომ ადამიანების უმეტესობა მატარებლით მხოლოდ რამდენიმე გაჩერებას მგზავრობს.