დონალდ ტრამპი: ჩვენმა მზარდმა ეკონომიკამ აგვისტოში 162 ათასი სამუშაო ადგილი შექმნა

აშშ-ის პრეზიდენტმა დონალდ ტრამპმა თავის სოციალურ ქსელში დაწერა, რომ აგვისტოში ქვეყანაში დამატებით 162 ათასი სამუშაო ადგილი შეიქმნა.

„შესანიშნავი ამბავი! ჩვენმა მზარდმა ეკონომიკამ აგვისტოში 162 ათასი სამუშაო ადგილი შექმნა, ჩვენი დიდი ამერიკელი მშრომელების პატივსაცემად, რომლებსაც ამ შრომის დღეს და ყოველ შრომის დღეს ვზეიმობთ.

ეს ძლიერი მაჩვენებელი თითქმის სამჯერ აღემატება Bloomberg-ის გამოკითხვის ეგრეთ წოდებული „ეკონომისტების“ პროგნოზს, რომლებიც კვლავაც ტრამპის სინდრომით არიან შეპყრობილნი.

ტრამპის ბუმის შედეგები მრავალი ინდუსტრიის მასშტაბით არის თვალსაჩინო. ჩემი ადმინისტრაციის სამართლიანი ვაჭრობის პოლიტიკამ, რომელსაც ტარიფების სახით შესანიშნავი ინსტრუმენტი აქვს, გლობალურ ეკონომიკაში ვითარება შეცვალა და საწარმოო სამუშაო ადგილები ამერიკაში ისე დააბრუნა, როგორც არასდროს“, - დაწერა ტრამპმა.

როგორც თეთრი სახლის ლიდერმა აღნიშნა, ამერიკაში ამჟამად ქარხნების მშენებლობის ბუმია. მისი თქმით, ეს იმით არის გამოწვეული, რომ სახელმწიფომ ბევრ კომპანიას საგადასახადო შეღავათი დაუწესა.