დონალდ ტრამპი: ირანელები ამბობენ, რომ საბოლოო გადაწყვეტილებებს აიათოლა იღებს. ყველასთან შეხვედრის სურვილი მაქვს და რაღაც ეტაპზე, ალბათ მასაც შევხვდები

შეერთებული შტატების პრეზიდენტი აცხადებს, რომ ირანში საბოლოო გადაწყვეტილებას აიათოლა იღებს და შესაბამისად მასთან შეხვედრის სურვილი აქვს, თუმცა ამ საკითხზე ჯერ საფუძვლიანად არ უფიქრია. მირანდა დივაინის პოდკასტში მონაწილეობისას დონალდ ტრამპმა ისრაელის პრემიერთან ხისტი საუბარი გაიხსენა და აღნიშნა, რომ ნეთანიაჰუზე გაბრაზებული არ არის, რადგანაც ის ომში მყოფი ქვეყნის ლიდერია.

„ვერ ვიტყოდი, რომ გაბრაზებული ვიყავი. ცოტა გამაღიზიანა იმან, რომ მუდმივად ებრძვის ლიბანს. მე ვუთხარი: „ბიბი, ეს უნდა შეწყდეს“, მაგრამ ჩვენ კარგი ურთიერთობები გვაქვს. ის ომში მყოფი ქვეყნის პრემიერია, მე ომში მყოფი ქვეყნის პრეზიდენტი. კარგად ვუგებთ ერთმანეთს.

ირანელები ამბობენ, რომ საბოლოო გადაწყვეტილებებს აიათოლა იღებს. ასე ხდება დიდი ხანია, ჯერ მამამისი იღებდა, ახლა თვითონ იღებს, როგორც მემკვიდრე, მაგრამ ჩვენ კარგად მივდივართ. რაც შეეხება მასთან შეხვედრას, ამაზე არ მიფიქრია. ვისურვებდი მასთან შეხვედრას. ყველასთან შეხვედრის სურვილი მაქვს და რაღაც ეტაპზე, ალბათ მასაც შევხვდები“, - განაცხადა ტრამპმა.

ისრაელი ლიბანის ტერიტორიაზე იერიშებს განაგრძობს. ცაჰალის სამიზნეში რამდენიმე რაიონი მოექცა. ვრცელდება ცნობები ორი სამხედროს დაღუპვის შესახებ. ისრაელის არმიის ცნობით იერიშის მიზეზი მოპოვებული ინფორმაცია გახდა, რომლის მიხედვითაც ჰეზბოლა ისრაელელ სამხედროებზე თავდასხმას გეგმავდა.