დონალდ ტრამპი საარჩევნო რეფორმის დაუყოვნებლივ მიღებას ითხოვს

აშშ-ის პრეზიდენტმა, დონალდ ტრამპმა საკუთარ სოციალურ პლატფორმაზე განცხადება გაავრცელა, რომელშიც უზენაესი სასამართლოს დღევანდელი გადაწყვეტილების კრიტიკასთან ერთად, საარჩევნო რეფორმის საკანონმდებლო პაკეტის, SAVE AMERICA ACT-ის დაუყოვნებლივ მიღების აუცილებლობაზე ისაუბრა.

ტრამპის თქმით, მიუღებელია პრაქტიკა, როდესაც ხმების დათვლა არჩევნების დასრულებიდან ხანგრძლივი დროის შემდეგაც გრძელდება. პრეზიდენტი აცხადებს, რომ ქვეყანაში მიმდინარე „კომუნისტური მოძრაობის“ ფონზე, რომელიც, მისი შეფასებით, ისტორიულ საფრთხეებსაც კი აღემატება, აუცილებელია საარჩევნო პროცესის მკაცრი რეგულაციებით გამკაცრება.

ტრამპის მიერ ინიცირებული SAVE AMERICA ACT-ი სამ ძირითად მოთხოვნას აერთიანებს:

ყველა ამომრჩეველს უნდა მოეთხოვებოდეს პირადობის დამადასტურებელი ფოტოსურათიანი დოკუმენტის წარდგენა. ყველა ამომრჩეველმა უნდა დაადასტუროს აშშ-ის მოქალაქეობა. ფოსტით ხმის მიცემა უნდა აიკრძალოს, გარდა ავადმყოფობის, შეზღუდული შესაძლებლობის, სამხედრო სამსახურში ყოფნის ან მივლინების შემთხვევებისა.

პრეზიდენტი კატეგორიულია აღნიშნულ მოთხოვნებთან დაკავშირებით და აცხადებს, რომ მათ წინააღმდეგობას მხოლოდ „გაყალბების სურვილი“ შეიძლება ედოს საფუძვლად.

ტრამპმა აღნიშნა, რომ წარმომადგენელთა პალატამ ეს კანონპროექტი უკვე სამჯერ დაამტკიცა, თუმცა სენატი მის მიღებას აფერხებს. მან კონკრეტულად დაასახელა ხუთი „რესპუბლიკელი“ სენატორი - ლიზა მურკოვსკი, სიუზან კოლინზი, ტომ ტილისი, ბილ კესიდი და მიტჩ მაკკონელი - და მათ, „დემოკრატებთან“ ერთად, „ქვეყნის გადარჩენის“ მიზნით, კანონპროექტის მხარდაჭერისკენ მოუწოდა.

„აღარ შეიძლება მეტი საბაბის მოძებნა!“ - წერს დონალდ ტრამპი თავის მიმართვაში.