დონალდ ტუსკმა აღშფოთება გამოხატა იმის გამო, რომ მისი ქვეყანა არ მიიწვიეს დიდი ბრიტანეთის, საფრანგეთის, გერმანიისა და უკრაინის ლიდერების სამიტზე, რომელიც 7 ივნისს ლონდონში გაიმართა

პოლონეთის პრემიერ-მინისტრმა, დონალდ ტუსკმა აღშფოთება გამოხატა იმის გამო, რომ მისი ქვეყანა არ მიიწვიეს დიდი ბრიტანეთის, საფრანგეთის, გერმანიისა და უკრაინის ლიდერების სამიტზე, რომელიც 7 ივნისს ლონდონში გაიმართა.

პოლონეთის პრემიერმა აღნიშნა, რომ პოლონეთი პატივს არ სცემს იმ გადაწყვეტილებებს, რომელთა განხილვაშიც ის არ მონაწილეობს, რაც უკრაინის ომის შესახებ მოლაპარაკებებს ეხება. ამის შესახებ ტუსკმა გერმანიის კანცლერ ფრიდრიხ მერცს სამშაბათს გამართული სატელეფონო საუბრისას განუცხადა.

„დღეს დილით ხანგრძლივი საუბარი მქონდა კანცლერ მერცთან, რომელმაც განმარტა თავისი მოტივები და დეტალურად გადმოსცა ლონდონში გამართული მოლაპარაკებების მსვლელობა. მე ვუთხარი, რომ პოლონეთის თვალსაზრისით, ჩვენ პატივს არ ვცემთ არანაირ შეთანხმებას, რომელშიც პოლონეთი არ მონაწილეობს, ანუ ისინი ჩვენთვის სავალდებულო არ იქნება, ხოლო პოლონეთი აბსოლუტურად აუცილებელი რგოლია უკრაინისა და რეგიონის მომავალზე სერიოზული დისკუსიებისთვის“, - ხაზგასმით აღნიშნა პოლონეთის მთავრობის ხელმძღვანელმა.

ტუსკმა განაცხადა, რომ ორშაბათს ასევე ესაუბრა იტალიის პრემიერ-მინისტრს, ჯორჯია მელონის, რომელიც „აღფრთოვანებული არ არის ისეთი ფორმატის არსებობით, როგორიც E3-ია“.

მისი თქმით, უახლოეს დღეებში მოეწყობა შეხვედრა „ხუთეულის“ ფორმატში, პოლონეთისა და იტალიის მონაწილეობით.