DW: რუსმა ოლიგარქებმა პუტინთან შეხვედრის შემდეგ უკრაინაში ომის გასაგრძელებლად 220 მილიარდი რუბლი გადარიცხეს

რუსმა ოლიგარქებმა რუსეთის პრეზიდენტთან ვლადიმერ პუტინთან გამართული შეხვედრის შემდეგ უკრაინაში ომის გასაგრძელებლად 220 მილიარდი რუბლი გადარიცხეს. ინფორმაციას DW-ს რუსულენოვანი რედაქცია ავრცელებს.

გამოცემის ცნობით, პუტინთან დახურული შეხვედრა 26 მარტს გაიმართა. შეხვედრაზე კრემლის ლიდერმა განაცხადა, რომ ის უკრაინასთან ომის გაგრძელებას აპირებს და ბიზნესს დახმარება სთხოვა.

კრემლის პრესსპიკერის დიმიტრი პესკოვის განცხადებით, ერთ-ერთი შემომწირველი ბიზნესმენი სულეიმან ქერიმოვია. გარდა ამისა, რუსეთის ომს ფული ოლიგარქებმა ოლეგ დერიპასკამ და ვლადიმერ პოტანინმაც შესწირეს.

როგორც DW აღნიშნავს, 2026 წლის იანვარ-აპრილში რუსეთის ფედერალური ბიუჯეტის დეფიციტმა რეკორდულ 5,877 ტრილიონ რუბლს მიაღწია, რაც დაგეგმილზე 1,6-ჯერ მეტია.