ძლიერი წვიმა და წყალმოვარდნები სენაკში

სტიქია სენაკის მუნიციპალიტეტში. ძლიერი წვიმის შედეგად წყალდიდობამ მოსახლეობა დააზარალა, დააზიანა მუნიციპალური ინფრასტრუქტურა.

დაიტბორა ქუჩები, ეზოები და სახლების პირველი სართულები, ასევე სახნავ-სათესი ფართობები.

დაზიანდა ხიდების ნაწილი და ადმინისტრაციული ერთეულების შიდა გზები. სტიქიის ზონაში იმყოფებიან ადგილობრივი თვითმმართველობის წარმომადგენლები.

„ძლიერი წყალმოვარდნის შედეგად, სანიაღვრე არხებმა ვერ გაატარა და წყალი გადმოვიდა, დატბორილია ოჯახები. სხვადასხვა ადმინისტრაციულ ერთეულში ჭარბი წყლის მოვარდნის შედეგად გადმოვიდა მდინარეები, დააზიანა ხიდბოგირები, ასევე ხიდები. შეიქმნა სამუშაო ჯგუფი, დილიდან მუნიციპალიტეტის მერიის ყველა თანამშრომელი ადგილზეა და მიმდინარეობს ზარალის დათვლა. ასევე მიმდინარეობს სტიქიის სალიკვიდაციო სამუშაოები. ჩართულია მუნიციპალური ტექნიკა. ვცდილობთ მაქსიმალურად დავეხმაროთ და დახმარება დროულად აღმოვუჩინოთ ჩვენს მოსახლეობას“, - განაცხადა სენაკის მერმა, ვახტანგ გადელიამ.