ემანუელ მაკრონი კოსმოსის საკითხებზე პირველ საერთაშორისო სამიტზე: გამოწვევებზე პასუხის გასაცემად აუცილებელია საერთო მმართველობა, რომელშიც ყველა აქტიური ძალა იქნება ჩართული. სწორედ ეს არის ამ სამიტის ერთ-ერთი მიზანიც - ჩვენი კოსმოსური ევროპა კვლავ მყიფეა და დაჩქარება გვჭირდება

კოსმოსის საკითხებზე პირველ საერთაშორისო სამიტზე მსოფლიო ლიდერებმა პოლიტიკური განცხადებები გააკეთეს და მათი ხედვები გააჟღერეს. სამიტის მონაწილეებს სიტყვით მიმართა მასპინძელი ქვეყნის, საფრანგეთის პრეზიდენტმა. ემანუელ მაკრონმა აღნიშნა, რომ გამოწვევებზე პასუხის გასაცემად აუცილებელია საერთო მმართველობა, რომელშიც ყველა აქტიური ძალა იქნება ჩართული.

„ეს სამიტი მსოფლიო მასშტაბისაა და ჩვენ ვმასპინძლობთ 90-ზე მეტ სახელმწიფოსა და მთავრობის მეთაურს.

მინდა გითხრათ, რომ საფრანგეთს სურს, იყოს ახალი თაობის კოსმოსური ძალების ბუნებრივი პარტნიორი. ჩვენი კოსმოსური ამბიცია სანდოა. ის ეკონომიკური მნიშვნელობის სფეროცაა, სადაც ძალიან ბევრი კომპანია ქმნის ხვალინდელ ინდუსტრიას. ის ასევე ბრძოლის ველზე ოპერატიული უპირატესობის მიღწევის საშუალებაა. მოკლედ, კოსმოსი ყველგან არის. ამიტომ ეს სამიტი ძალისა და დიალოგის გზავნილს ატარებს.

1967 წლის ხელშეკრულების მიუხედავად, კოსმოსური სივრცე კვლავ რჩება ერთადერთ დიდ გლობალურ საერთო რესურსად, რომელიც გამოწვევების შესაბამისი რეგულირების საგანი არ არის.

ვფიქრობ, ამ გამოწვევებზე პასუხის გასაცემად აუცილებელია საერთო მმართველობა, რომელშიც ყველა აქტიური ძალა იქნება ჩართული. სწორედ ეს არის ამ სამიტის ერთ-ერთი მიზანიც.

დიახ, ჩვენ ვიმყოფებით ვალდებულებების აღების სამიტზე. ჩვენი კოსმოსური ევროპა კვლავ მყიფეა და დაჩქარება გვჭირდება.

ჩვენ გავაგრძელებთ ინვესტირებას და 2030 წლამდე კოსმოსურ სფეროში 20 მილიარდ ევროს ჩავდებთ. მაგრამ ახლა უფრო შორს უნდა წავიდეთ და გადავდგათ ევროპული ნაბიჯი, რომელიც ამ უდიდესი გამოწვევების მასშტაბის შესაბამისი იქნება.

პირველ რიგში, ძლიერი ხედვით - გავაერთიანოთ სახელმწიფოები და მოქმედი პირები", - განაცხადა საფრანგეთის პრეზიდენტმა.

სამიტში პრეზიდენტ მაკრონის მიწვევით, მონაწილეობს საქართველოს დელეგაცია პრემიერ-მინისტრის ხელმძღვანელობით. „სამიტი ეხება გლობალური უსაფრთხოებისთვის მნიშვნელოვან თემას, საქართველო არის ჩართული სხვადასხვა საერთაშორისო პლატფორმაზე შესაბამისი გადაწყვეტილებების მიღებაში", - განაცხადა ირაკლი კობახიძემ მედიასთან.