ევროპარლამენტში ხელოვნური ინტელექტის რეგულირების საკითხზე მმართველი კოალიციის პოზიციები გაიყო
ევროკომისიის პრეზიდენტ ურსულა ფონ დერ ლაიენის მხარდამჭერი ცენტრისტული კოალიციის წევრები ტექნოლოგიური კომპანიების პასუხისმგებლობის გამკაცრების საკითხზე ვერ შეჯერდნენ.
როგორც ირკვევა, ევროპარლამენტში მწვავე დაპირისპირება ხელოვნური ინტელექტის სისტემების მიერ მიყენებული ზიანის ანაზღაურების წესებს შეეხო. მემარცხენე-ცენტრისტულმა ფრთამ კიბერუსაფრთხოების რისკების ზრდის გამო მკაცრი საკანონმდებლო აქტის მიღება მოითხოვა. მემარჯვენე-ცენტრისტულმა ძალებმა კი რეგულაციების გამარტივებას დაუჭირეს მხარი.
სოციალისტებმა და „მწვანეებმა“ ტექნოლოგიური ფირმებისთვის ტრადიციული მწარმოებლების მსგავსი ვალდებულებების დაწესება მოითხოვეს. ევროპარლამენტარ კიმ ვან სპარენტაკის შეფასებით, უსაფრთხოების წესების გაუქმება დაუშვებელია და კანონმდებლობამ ხელოვნური ინტელექტის შექმნისა და გამოცდის ეტაპები სრულად უნდა მოიცვას.
საპასუხოდ, შვედმა დეპუტატმა არბა კოკალარმა ზედმეტი რეგულაციების შემოღება მკაცრად გააკრიტიკა. დეპუტატის განცხადებით, ევროკავშირმა ყურადღება ბიუროკრატიის შემცირებაზე, კერძო ინვესტიციების მოზიდვასა და გამოთვლითი ინფრასტრუქტურის განვითარებაზე უნდა გაამახვილოს.
ცნობისთვის, ევროკომისიამ ხელოვნური ინტელექტის პასუხისმგებლობის დირექტივაზე მუშაობა 2022 წელს დაიწყო. თუმცა, კონკურენტუნარიანობის გაზრდისა და ბიუროკრატიული პროცესების გამარტივების მიზნით, ინსტიტუტმა პროექტი გასულ წელს გაიწვია.
BM.GE
წყარო: bm.ge