ერდოღანი იმედოვნებს, რომ ანკარაში დაგეგმილი ნატოს სამიტის მთავარი მიღწევა ალიანსში სოლიდარობისა და ერთიანობის გაძლიერება იქნება
თურქეთის პრეზიდენტი იმედოვნებს, რომ ივლისში ანკარაში დაგეგმილი ნატოს სამიტის მთავარი მიღწევა ალიანსში სოლიდარობისა და ერთიანობის გაძლიერება იქნება. რეჯეფ თაიფ ერდოღანის განცხადებით, თუკი მოკავშირეებს გლობალურ გამოწვევებთან გამკლავება სურთ, მათ ტვირთი სამართლიანად და თანაბრად უნდა გაინაწილონ, მათ შორის მოხსნან თავდაცვის ინდუსტრიაში ვაჭრობაზე არსებული წინაღობები.
„ჩვენი მთავარი მოლოდინია ისეთი შედეგების მიღწევა, რომლებიც დაიცავს მოკავშირეების ეროვნული უსაფრთხოების სენსიტიურ საკითხებს, განამტკიცებს ალიანსის სოლიდარობისა და ერთიანობის სულისკვეთებას. თუ გვსურს ვებრძოლოთ იმ გამოწვევებს, რომელთა წინაშეც ვდგავართ, უნდა მოვხსნათ შეზღუდვები თავდაცვის ინდუსტრიით ვაჭრობაზე, ამავდროულად კი ტვირთის განაწილება ბალანსირებულად და სამართლიანად განვახორციელოთ“, - განაცხადა ერდოღანმა სტამბოლში, ნატოს წევრი ქვეყნების პარლამენტარებისთვის გამართულ ღონისძიებაზე.
მისივე თქმით, მოკავშირეები შეხვედრაზე ასევე განიხილავენ ირანში, უკრაინასა და ღაზაში მიმდინარე ომებს. ანკარა ნატოს სამიტს 7-8 ივლისს უმასპინძლებს.
იმედი
წყარო: imedinews.ge