ერდოღანი: მინდა ხაზგასმით აღვნიშნო, რომ უახლოეს მომავალში ჩვენ უნდა მივაღწიოთ შედეგებს რუსეთ-უკრაინის ომის დიალოგის გზით მოგვარების საკითხში

ნატოს საპარლამენტო ასამბლეის ფარგლებში უკრაინაში მიმდინარე ომის დასრულების საკითხი კვლავ აქტუალური გახდა. CNN Türk-ის ინფორმაციით, თურქეთის პრეზიდენტმა, რეჯეფ თაიფ ერდოღანმა კონფლიქტის მოსაგვარებლად უფრო აქტიური სამშვიდობო ძალისხმევისკენ მოუწოდა.

ერდოღანის განცხადებით, ომის დარეგულირება მხოლოდ დიალოგის გზით არის შესაძლებელი.

„მინდა ხაზგასმით აღვნიშნო, რომ უახლოეს მომავალში ჩვენ უნდა მივაღწიოთ შედეგებს რუსეთ-უკრაინის ომის დიალოგის გზით მოგვარების საკითხში“, - განაცხადა თურქეთის ლიდერმა.

თურქეთის პრეზიდენტმა აღნიშნა, რომ ანკარა მზადაა, გააგრძელოს სამშვიდობო ძალისხმევის მხარდაჭერა.

„როგორც მოკავშირე, რომელსაც შეუძლია ორივე მხარესთან მოლაპარაკება, წამოიწყოს ისეთი პროცესები, რომლებიც შედეგს გამოიღებს და, სამართლიანი პოზიციის წყალობით, მოიპოვა ორივე მხარის ნდობა, ჩვენ გავაგრძელებთ მშვიდობის მიღწევისკენ მიმართულ ძალისხმევაში აქტიურ წვლილის შეტანას“, - განაცხადა ერდოღანმა.