ევროპარლამენტარი ფიდიას პანაიოტოუ ევროკავშირში „ჩატ კონტროლის“ სისტემის შემოღებაზე: ეს სამწუხარო დღეა ევროპელებისთვის

ევროპარლამენტის წევრმა, ფიდიას პანაიოტოუმ სოციალურ ქსელში განაცხადა, რომ ევროკავშირში „ჩატ კონტროლის“ სისტემის შემოღება რეალობად იქცა.

პანაიოტოუს თქმით, მიუხედავად იმისა, რომ ევროპარლამენტარების უმრავლესობამ სადავო ინიციატივას მხარი არ დაუჭირა, კენჭისყრის შედეგად ვერ შეგროვდა აბსოლუტური უმრავლესობისთვის საჭირო 361 ხმა, რამაც რეგულაციის დროებითი ვადის გახანგრძლივება განაპირობა.

„ეს სამწუხარო დღეა ევროპელებისთვის“, - წერს პანაიოტოუ თავის მიმართვაში.

TWITTER POST

აღნიშნული გადაწყვეტილება ითვალისწინებს ევროკავშირის კონფიდენციალურობის წესებიდან გამონაკლისის დროებით გახანგრძლივებას, რომელიც ონლაინ პლატფორმებს ბავშვთა სექსუალური ძალადობის ამსახველი იდენტიფიცირებული მასალების (CSAM) ნებაყოფლობითი სკანირების უფლებას აძლევს. ეს ზომა, რომელიც საზოგადოებაში „მინი-ჩატ კონტროლის“ სახელითაა ცნობილი, ძალაში 2028 წლის 3 აპრილამდე დარჩება.

მიუხედავად იმისა, რომ ეს მექანიზმი არ ავალდებულებს კომპანიებს კერძო შეტყობინებების სკანირებას და არ არღვევს „ბოლომდე დაშიფვრის“ სტანდარტს, ციფრული უფლებების დამცველები და პოლიტიკოსების ნაწილი პროცესს კრიტიკულად აფასებენ. მათი თქმით, საპროცედურო მანევრებმა და საკითხის დაჩქარებულმა განხილვამ ხელი შეუშალა რეგულაციის გრძელვადიანი შედეგების სრულფასოვან ანალიზს, რამაც, მათივე აზრით, შეიძლება გზა გაუხსნას უფრო მასშტაბურ მეთვალყურეობას.

ამასთან, ბრიუსელში კვლავ გრძელდება მოლაპარაკებები „ჩატ კონტროლის“ გაცილებით უფრო ფართო, მუდმივ რეგულაციაზე, რომელიც დარგის ექსპერტებისა და აქტივისტების მხრიდან მწვავე შეშფოთებას იწვევს.