ევროპარლამენტმა პირადი ჩატების კონტროლის უფლებას მხარი დაუჭირა

ევროპარლამენტმა მხარი დაუჭირა ევროკავშირის კონფიდენციალურობის წესებიდან დროებითი გამონაკლისის გახანგრძლივებას, რომელიც ონლაინ პლატფორმებს ბავშვთა სექსუალური ძალადობის ამსახველი მასალების (CSAM) ნებაყოფლობითი სკანირების უფლებას აძლევს. ეს ზომა, რომელიც საჯარო დებატებში ხშირად „ჩატ კონტროლის“ ფართო განხილვის ნაწილად მოიხსენიება, ძალაში 2028 წლის 3 აპრილამდე დარჩება.

აღნიშნული გადაწყვეტილება მესინჯერებსა და პლატფორმებს აძლევს უფლებას (თუმცა არ ავალდებულებს), დაასკანირონ მიმოწერები უკვე იდენტიფიცირებული ბავშვთა სექსუალური ძალადობის ამსახველი მასალების (CSAM), ძირითადად, ფოტოებისა და ვიდეოების გამოსავლენად.

პატრიკ ბრეიერის, ევროპარლამენტის ყოფილი წევრისა და „მეკობრეთა პარტიის“ წარმომადგენლის განცხადებით, აღნიშნული გადაწყვეტილება ამერიკულ ტექნოლოგიურ კომპანიებს კვლავ აძლევს კერძო შეტყობინებების სკანირების უფლებას, ყოველგვარი სასამართლო ორდერისა თუ წინასწარი დასაბუთებული ეჭვის გარეშე. ეს წესი ვრცელდება ისეთ პლატფორმებზე, როგორიცაა Instagram, Discord, Snapchat და Xbox, ასევე Gmail-ისა და iCloud-ის ელექტრონულ ფოსტაზე.

გამონაკლისის გახანგრძლივების წინააღმდეგ მიმართულმა წინადადებამ მეორე მოსმენით კენჭისყრისას ვერ მიიღო აუცილებელი აბსოლუტური უმრავლესობა.

აღსანიშნავია, რომ ეს კენჭისყრა მხოლოდ დროებით, ნებაყოფლობით ჩარჩოს ეხება. იგი არ ავალდებულებს პლატფორმებს სკანირებას, არ მოითხოვს „ბოლომდე დაშიფვრის“ გატეხვას და არ აძლევს მთავრობებს კერძო შეტყობინებებზე პირდაპირი წვდომის უფლებას.

ბრიუსელის მიერ ინიცირებული, გაცილებით უფრო სადავო მუდმივი „ჩატ კონტროლის“ წინადადება (ბავშვთა სექსუალური ძალადობის შესახებ სრული რეგულაცია), რომელმაც შესაძლოა უფრო ფართო ვალდებულებები დააწესოს და რომელმაც სერიოზული შეშფოთება გამოიწვია დაშიფვრასა და მასობრივ მეთვალყურეობასთან დაკავშირებით, კვლავ ცალკე განიხილება სამმხრივი მოლაპარაკებების ფარგლებში და ის არ არის მიღებული.

ევროპარლამენტმა არაერთხელ გაუსვა ხაზი მიზანმიმართული და პროპორციული ზომების საჭიროებას.