Financial Times: ევროკავშირის სანქციებში შეტანილი გამონაკლისით ფრანგული TotalEnergies რუსული გაზის აზიაში გაყიდვას გააგრძელებს

ფრანგულ კომპანია TotalEnergies შესაძლებლობა ექნება ციმბირში მდებარე თავისი მთავარი პროექტიდან წარმოებული გათხევადებული ბუნებრივი აირი აზიის ბაზრებზე კვლავ გაყიდოს, მას შემდეგ, რაც ევროკავშირმა ევროპულ კომპანიებს რუსული გაზის ბლოკის ფარგლებს გარეთ ტრანსპორტირების გაგრძელების უფლება მისცა. ინფორმაციას Financial Times-ი ავრცელებს.

გამოცემის ცნობით, გადაწყვეტილება მას შემდეგ მიიღეს, რაც საბერძნეთმა მოსკოვის წინააღმდეგ სანქციების სხვა პაკეტისთვის მხარდაჭერის სანაცვლოდ, ევროკავშირისგან გათხევადებულ გაზზე შეზღუდვების გადახედვა მოითხოვა.

ევროკავშირის გადაწყვეტილება ბერძნულ გადამზიდავ კომპანია Dynagas-საც საშუალებას აძლევს, რუსული გათხევადებული ბუნებრივი აირის მსოფლიო ბაზრებზე გადაზიდვებიდან მიღებული შემოსავლები შეინარჩუნოს.

საქმის დეტალებში გარკვეული სამი წყაროს ცნობით, გადაწყვეტილებით ისარგებლებს TotalEnergies-ც, რადგან კომპანია შეძლებს აზიელ მომხმარებლებს გათხევადებული გაზი მიაწოდოს იამალიდან - ციმბირის მასშტაბური პროექტიდან, რომელშიც ფრანგულ ენერგოკომპანიას 20%-იანი წილი ეკუთვნის.

ეს გამონაკლისი ფაქტობრივად აუქმებს ბრიუსელის გასული წლის ოქტომბერში მიღებულ გადაწყვეტილებას, რომლის მიხედვითაც მსგავსი გადაზიდვები 2026 წლის ბოლოდან უნდა აკრძალულიყო.

ახალი წესების თანახმად, ევროკავშირის კომპანიებს უფლება ექნებათ, გააგრძელონ გათხევადებული ბუნებრივი აირის მესამე ქვეყნებში ტრანსფერი, თუ შესაბამისი კონტრაქტები 2022 წლის თებერვალში რუსეთის უკრაინაში სრულმასშტაბიან შეჭრამდე იყო გაფორმებული და მიწოდების მოცულობა 2025 წლის დონეს არ გადააჭარბებს.

ევროკავშირის ერთ-ერთმა ოფიციალურმა პირმა განაცხადა, რომ ეს გადაწყვეტილება პრაქტიკული აუცილებლობით იყო ნაკარნახევი.

მისი თქმით, წინააღმდეგ შემთხვევაში ტვირთის გადამზიდავი გემები „ძალიან სწრაფად გადავიდოდა ჩინელი ოპერატორების ხელში. აკრძალვა იარსებებდა, მაგრამ რუსული გაზის ნაკადებზე რეალურ გავლენას ვერ მოახდენდა“.