Financial Times: ირანი სანქციების გვერდის ავლისთვის კრიპტოვალუტას იყენებს

ირანი კრიპტოვალუტების გამოყენებას ცდილობს, რათა აშშ-ის მიერ წარმოებული ომისა და ბლოკადის პირობებში სავაჭრო ოპერაციები შეინარჩუნოს. ინფორმაციას Financial Times-ი ავრცელებს.

გამოცემის ცნობით, თეირანმა აგრეთვე უცხოურ ვალუტაზე მკაცრი კონტროლი შეარბილა, რათა გამკაცრებული სანქციების გავლენა შეამციროს.

ირანი წლების განმავლობაში მოწყვეტილია გლობალურ საფინანსო სისტემას და უცხოური ვალუტის მიწოდების გასაკონტროლებლად იმპორტიორებსა და ექსპორტიორებს მკაცრ შეზღუდვებს უწესებდა. ამის გამო ბიზნესებმა ქვეყნის შიგნით და მის ფარგლებს გარეთ არადეკლარირებული შემოსავლების მნიშვნელოვანი მოცულობა დააგროვეს. ირანის სასამართლო სისტემის შეფასებით, ასეთი სახსრების ოდენობა 100 მილიარდ დოლარს აღემატება.

ირანელი ბიზნესმენების, რეჟიმთან დაახლოებული პირებისა და ანალიტიკოსების განცხადებით, ცენტრალურმა ბანკმა ბოლო თვეებში ვაჭრობის მონაწილეებს ფარულად მოუწოდა, ქვეყანაში სახსრები ნებისმიერი შესაძლო გზით დაებრუნებინათ, რათა მძიმე მდგომარეობაში მყოფი ეკონომიკისთვის საჭირო ფინანსური რესურსები უზრუნველეყოთ.

მათივე ცნობით, ამის ერთ-ერთი გზა კრიპტოვალუტების, განსაკუთრებით Tether-ის, თუმცა ასევე ბიტკოინის გამოყენებაა. კრიპტოვალუტებით ტრანსსასაზღვრო ანგარიშსწორება ირანული კრიპტობირჟების მეშვეობით ხორციელდება.

როგორც Financial Times-ი იუწყება, შერბილებული სისტემის პირობებში მოვაჭრეებს ასევე შეუძლიათ უცხოური ვალუტის გაცვლა ქვეყნის დიდ არაოფიციალურ ბაზარზე, ნაცვლად იმისა, რომ მთავრობის მიერ დადგენილი კურსები გამოიყენონ. გარდა ამისა, მათ ექსპორტიდან მიღებული შემოსავლების გამოყენება შეუძლიათ იმპორტის პირდაპირ დასაფინანსებლად ისე, რომ თანხები ოფიციალური სავალუტო სისტემის გავლით არ გაატარონ.

„ცენტრალურ ბანკს არ აინტერესებს, როგორ გადაირიცხა ეს თანხა. ექსპორტისთვის კრიპტოვალუტის სახით თანხის მიღება ახლა უკვე სრულად დამკვიდრებული პრაქტიკაა“, - განაცხადა რეჟიმთან დაახლოებულმა ერთ-ერთმა ბიზნესმენმა და დასძინა, რომ კონტროლის შემსუბუქება მას შემდეგ გახდა ფართოდ გავრცელებული, რაც თებერვალში აშშ-მა და ისრაელმა ომი დაიწყეს.

ირანის ცენტრალურმა ბანკმა კომენტარის გაკეთებაზე უარი განაცხადა.

ირანი წლების განმავლობაში ქმნიდა სანქციების გვერდის ავლის სისტემას, მათ შორის კრიპტოვალუტების გამოყენებით, თუმცა ომის პირობებში ტრანსსასაზღვრო ოპერაციების ალტერნატიული გზების მოძიებამ კიდევ უფრო დიდი მნიშვნელობა შეიძინა.

აშშ, რომელიც რამდენიმე თვის განმავლობაში ირანის პორტების ბლოკადას ახორციელებს, თეირანის იზოლაციის მიზნით ეკონომიკურ ზეწოლაზე გადავიდა და ირანთან სავაჭრო ურთიერთობებში ჩართულ პარტნიორებს სანქციებით დაემუქრა, წერს გამოცემა.