Financial Times: შუალედური არჩევნების შემდეგ „დემოკრატები“ ტრამპის ოჯახის წევრების მიმართ სისხლის სამართლებრივი დევნის დაწყებით იმუქრებიან

თუ აშშ-ის კონგრესის შუალედურ არჩევნებში „დემოკრატები“ გაიმარჯვებენ, პარტია „ტრამპის კრიმინალური ოჯახის“, მის ბიზნესპარტნიორებისა და მილიარდერი მოკავშირეების წინააღმდეგ გამოძიებების წარმოებას „აგრესიულად“ გეგმავს. ინფორმაციას Financial Times-ი აშშ-ის წარმომადგენელთა პალატის ზედამხედველობის კომიტეტში „დემოკრატების“ ყველაზე მაღალი რანგის წევრსა და კომიტეტის მომავალ თავმჯდომარეზე რობერტ გარსიაზე დაყრდნობით ავრცელებს.

„ჩვენი მუშაობის ყველაზე მნიშვნელოვანი ნაწილი „ტრამპის კრიმინალურ ოჯახზე“ იქნება ფოკუსირებული. თუ რაიმე ფორმით ხართ დაკავშირებული ტრამპებთან და ამერიკულ ბიზნესს წარმოადგენთ, კონგრესის კითხვებზე პასუხის გაცემა მოგიწევთ“, - განაცხადა გარსიამ.

Financial Times-თან ინტერვიუში გარსიამ იმ საგამოძიებო პრიორიტეტებზე ისაუბრა, რომელთა განხორციელებასაც კომიტეტის დღის წესრიგზე კონტროლის მოპოვების შემთხვევაში გეგმავს. მათ შორისაა ისეთი მტკიცებულებების მოპოვება, რომლებმაც შესაძლოა დონალდ ტრამპის იმპიჩმენტის საკითხის დაყენებას შეუწყოს ხელი, ასევე ილონ მასკის კონგრესში დაკითხვა.

გარსიას განცხადებით, მისი აზრით, დონალდ ტრამპს „დანაშაული აქვს ჩადენილი“ და მის ქმედებებში „იმპიჩმენტისთვის საკმარისი სამართალდარღვევები“ იკვეთება.

„ვფიქრობ, ჩვენი მოვალეობაა, შევაგროვოთ მასალები და წარვადგინოთ მტკიცებულებები“, - განაცხადა მან.

გარსიას განცხადებები იმ ფონზე გაკეთდა, როდესაც წინასაარჩევნო კამპანიის ფარგლებში „დემოკრატები“, მათ შორის ჯორჯიის სენატორი ჯონ ოსოფი, ტრამპის ოჯახის მიერ სავარაუდო პირადი გამდიდრების საკითხს აშშ-ში ცხოვრების გაძვირების პრობლემას უპირისპირებენ და წარმომადგენელთა პალატასა და სენატში უმრავლესობის მოპოვებას ცდილობენ.

როგორც Financial Times-მა გასულ წელს გამოავლინა, ტრამპის ოჯახმა სხვადასხვა კრიპტოვალუტასთან დაკავშირებული საქმიანობიდან სულ მცირე 1 მილიარდი დოლარი მიიღო.

კრიპტოვალუტისა და ტექნოლოგიური სექტორების კორპორაციულმა დონორებმა ტრამპის ოჯახთან მჭიდრო კავშირები დაამყარეს და პრეზიდენტთან წვდომა მიიღეს. გამოცემის ცნობით, ზოგიერთ მათგანს სამართლებრივი შეღავათები ან შეწყალება მიენიჭა, სახელმწიფო კონტრაქტები გადაეცა ან მათთვის სასარგებლო პოლიტიკური გადაწყვეტილებები მიიღეს.

გარსიას თქმით, მას დონალდ ტრამპ უმცროსთან არაერთი კითხვა აქვს, მათ შორის, რატომ მიიღო მის მიერ დაფინანსებულმა ზოგიერთმა კომპანიამ პენტაგონისგან მრავალმილიონიანი კონტრაქტები და რატომ დახარჯა ერთმა რუსმა ბიზნესმენმა ასობით ათასი დოლარი ბაჰამის კუნძულებზე გამართულ მის საქორწილო ღონისძიებებზე.

გარსიას, როგორც კომიტეტის თავმჯდომარეს, „დემოკრატების“ უმრავლესობის შემთხვევაში მოწმეების ფიცის ქვეშ დაკითხვაზე იძულებით დაბარების უფლებამოსილება ექნება. თუმცა, მან აღიარა, რომ პრეზიდენტის ოჯახის წევრის კონგრესში ჩვენების მისაცემად მიყვანა „უზარმაზარი ამოცანა“ იქნება, თუმცა აღნიშნა, რომ „დემოკრატები“ ამ საკითხზე „აგრესიულად იმუშავებენ“.