Financial Times: ტრამპმა განაცხადა, რომ შესაძლოა, ევროპიდან ამერიკული სამხედრო კონტინგენტი სრულად გაიყვანოს - ანკარაში, ნატოს სამიტზე ვიზიტისას გაჟღერებული ეს განცხადება რეგიონში მოკავშირეების მიმართ მის მიერ გაკეთებულ მუქარებს შორის ერთ-ერთი ყველაზე მასშტაბურია

დონალდ ტრამპმა განაცხადა, რომ შესაძლოა, ევროპიდან ამერიკული სამხედრო კონტინგენტი სრულად გაიყვანოს - ანკარაში, ნატოს სამიტზე ვიზიტისას გაჟღერებული ეს განცხადება რეგიონში მოკავშირეების მიმართ მის მიერ გაკეთებულ მუქარებს შორის ერთ-ერთი ყველაზე მასშტაბურია, - წერს ბრიტანული გამოცემა Financial Times-ი.

ეს მუქარა მას შემდეგ გაჟღერდა, რაც აშშ-ის პრეზიდენტმა განაახლა მოწოდებები გრენლანდიის გაკონტროლების თაობაზე, რითაც შესაძლოა ხელახლა გაამწვავოს კრიზისი, რომელიც ტრანსატლანტიკური ერთიანობისთვის ყველაზე დიდ საფრთხედ იქცა.

„ჩვენ შესაძლოა ჩვენი ყველა ჯარისკაცი გამოვიყვანოთ ევროპიდან“, - განაცხადა ტრამპმა სამიტის წინა დღეს, სამშაბათს, ანკარაში, თურქეთის პრეზიდენტ რეჯეფ თაიფ ერდოღანთან შეხვედრისას.

„კვლავაც ძალაშია მოსაზრება, რომ [გრენლანდია] შეერთებული შტატების კონტროლქვეშ უნდა იყოს და არა დანიის“, - განაცხადა მან.

აშშ-ის პრეზიდენტმა ეს მუქარა ასევე დაუკავშირა თავის უკმაყოფილებას იმის გამო, რომ ევროპელი მოკავშირეები არ გამოთქვამენ მზადყოფნას, „დაეხმარონ“ მას ირანთან ომში.

ევროპის მასშტაბით დაახლოებით 80 000 ამერიკელი ჯარისკაცია დისლოცირებული. ნატოს მოკავშირეები ამ ძალებს კონტინენტის თავდაცვის კრიტიკულ ელემენტად, თავდასხმის შემაკავებელ ფაქტორად და ვაშინგტონის იმ ვალდებულების განსახიერებად მიიჩნევენ, რომელიც თავდასხმის შემთხვევაში სამხედრო დახმარების აღმოჩენას ითვალისწინებს.