გაერო: ადამიანთა 30%-ზე მეტისთვის ჯანსაღი კვება ძვირია

გაერომ სურსათის ხელმისაწვდომობის პრობლემის შესახებ განაცხადა - პლანეტაზე ყოველი მესამე ადამიანი ჯანსაღი საკვების შეძენას ვერ ახერხებს.

ორგანიზაციის ახალ ანგარიშში აღნიშნულია, რომ 2,69 მილიარდ ადამიანს არ აქვს შესაძლებლობა, მიიღოს მრავალფეროვანი საკვები და ენერგიასა და საკვებ ნივთიერებებზე არსებული მოთხოვნილება დაიკმაყოფილოს. 2030 წლისთვის შიმშილის აღმოსაფხვრელად „უზარმაზარი“ სამუშაოს ჩატარება იქნება საჭირო.

მიუხედავად იმისა, რომ 2025 წელს შიმშილის გლობალური პრობლემა შემცირდა, იმ ადამიანთა წილი, რომლებსაც არ შეუძლიათ ჯანსაღი კვების უფლება მისცენ თავს, „უკიდურესად მაღალი“ რჩება, - განაცხადა გაეროს სურსათისა და სოფლის მეურნეობის ორგანიზაციის მთავარმა ეკონომისტმა, მაქსიმო ტორერომ.

2026 წელს ჯანსაღი კვების ღირებულება მსოფლიოში საშუალოდ დღეში 4,28 დოლარს შეადგენს. ტორეროს თქმით, სახელმწიფო პოლიტიკა, როგორც წესი, ფოკუსირებულია მარცვლეულისა და სახამებლიანი პროდუქტების წარმოების შეღავათებზე და არა ხორცზე, რძის ნაწარმზე, ხილსა და ბოსტნეულზე. „ეს ნიშნავს კალორიებს, მაგრამ არა რაციონის მრავალფეროვნებას“, - განმარტა ექსპერტმა და აღნიშნა, რომ ეს იწვევს სიმსუქნის დონის ზრდასა და სერიოზულ დაავადებებს.

ტორერო მოუწოდებს სახელმწიფოებს, ინფრასტრუქტურაში, კვლევებსა და განვითარებაში ჩადონ ინვესტიციები. ანგარიშში აღნიშნულია, რომ ხორცის, რძის ნაწარმის, ასევე ხილისა და ბოსტნეულის ღირებულების შემცირება ეფექტიან მიწოდების ჯაჭვებს შეუძლია.