გაეროს ადამიანის უფლებათა უმაღლესი კომისარი: აშშ-სა და ირანს შორის განახლებული საომარი მოქმედებები უზარმაზარი უკუსვლაა რეგიონში და მის ფარგლებს გარეთ მცხოვრები მშვიდობიანი მოსახლეობისთვის

აშშ-სა და ირანს შორის განახლებული საომარი მოქმედებები უზარმაზარი უკუსვლაა რეგიონში და მის ფარგლებს გარეთ მცხოვრები მშვიდობიანი მოსახლეობისთვის, - განაცხადა გაეროს ადამიანის უფლებათა უმაღლესმა კომისარმა, ვოლკერ ტურკმა.

„ეს ძირს უთხრის სამშვიდობო ძალისხმევას და ამძაფრებს არასტაბილურობას, რაც ადამიანის უფლებების კუთხით მთელი რეგიონისთვის სერიოზულ საფრთხეს ქმნის“, - აღნიშნა მან განცხადებაში.

გაეროს მაღალჩინოსანმა დასძინა, რომ სამოქალაქო ინფრასტრუქტურაზე დარტყმები, ჰორმუზის სრუტეში მიმდინარე საომარი მოქმედებები და რეგიონის სხვა ქვეყნების წინააღმდეგ განხორციელებული თავდასხმები „დაუყოვნებლივ უნდა შეწყდეს“.

ტურკმა ხაზგასმით აღნიშნა, რომ ჰორმუზის სრუტის ჩაკეტვის შესახებ გავრცელებული ცნობები „ძალიან საგანგაშოა“, რადგან ამას შესაძლოა „ადამიანის უფლებებზე გავლენა ჰქონდეს რეგიონის მიღმაც“.