გამოკითხვა: ირანთან ომს ამერიკელების მხოლოდ მესამედი უჭერს მხარს, უმეტესობა კი ტრამპის მიზნებს გაურკვევლად მიიჩნევს
სააგენტო Reuters-ის დაკვეთით კომპანია Ipsos-ის მიერ ჩატარებული გამოკითხვის თანახმად, ამერიკელების მხოლოდ მესამედი უჭერს მხარს ირანთან მიმდინარე ომს. ეს არის ყველაზე დაბალი მაჩვენებელი მას შემდეგ, რაც კონფლიქტი ხუთი თვის წინ დაიწყო.
ამავე კვლევის მიხედვით, რესპონდენტების უმრავლესობა მიიჩნევს, რომ პრეზიდენტ დონალდ ტრამპს აშშ-ის სამხედრო ჩართულობის მიზნები მკაფიოდ არ განუმარტავს.
გამოკითხვა პარასკევიდან კვირის ჩათვლით ჩატარდა. მისი შედეგების თანახმად, ტრამპის საქმიანობის მოწონების მაჩვენებელი 37%-მდე გაიზარდა, რაც გასულ თვესთან შედარებით სამი პროცენტული პუნქტით მეტია. გასულ თვეში მისი რეიტინგი პრეზიდენტობის პერიოდში ყველაზე დაბალ ნიშნულს გაუტოლდა.
ტრამპმა კონფლიქტის მიზნებად სხვადასხვა დროს დაასახელა ირანის მოსახლეობის მხარდაჭერა ხელისუფლების შეცვლისთვის, ირანის ბალისტიკური სარაკეტო შესაძლებლობების განადგურება და ქვეყნისთვის ბირთვული იარაღის მოპოვების აღკვეთა.
თუმცა, გამოკითხვის მიხედვით, ამერიკელთა 69%, მათ შორის „რესპუბლიკელების“ 40%, მიიჩნევს, რომ ტრამპს „ირანში აშშ-ის სამხედრო ჩართულობის მიზნები მკაფიოდ არ აუხსნია“.
თეთრი სახლის პრესსპიკერმა ოლივია უელსმა განაცხადა, რომ პრეზიდენტი გადაწყვეტილებებს „ცვალებადი საზოგადოებრივი აზრის გამოკითხვების“ საფუძველზე არ მიიღებს და კიდევ ერთხელ გაუსვა ხაზი მის პოზიციას, რომ ირანს ბირთვული იარაღის მოპოვების შესაძლებლობა არასოდეს უნდა მიეცეს.
„ამერიკელი ხალხისთვის ყველაზე მნიშვნელოვანია, ჰყავდეს უმაღლესი მთავარსარდალი, რომელიც მათი უსაფრთხოების უზრუნველსაყოფად გაბედულ გადაწყვეტილებებს იღებს“, - განაცხადა უელსმა.
Reuters/Ipsos-ის მონაცემებით, მას შემდეგ, რაც აშშ-მა და ისრაელმა 28 თებერვალს ირანზე იერიშები დაიწყეს, სამხედრო ოპერაციის მხარდაჭერა 40%-ს არ ასცდენია.
როგორც Reuters აღნიშნავს, ეს მნიშვნელოვნად განსხვავდება აშშ-ის ბოლო ათწლეულების სხვა სამხედრო კამპანიების საწყისი ეტაპისგან.
