გარდაიცვალა ცნობილი მეცნიერ-გამომგონებელი, საქართველოს ინჟინერიის აკადემიის აკადემიკოსი, საქართველოს მე-8 მოწვევის პარლამენტის წევრი თემურ მაისურაძე

გარდაიცვალა ცნობილი მეცნიერ-გამომგონებელი, საქართველოს ინჟინერიის აკადემიის აკადემიკოსი, საქართველოს მე-8 მოწვევის პარლამენტის წევრი თემურ მაისურაძე (პარტიული სიით, საარჩევნო ბლოკი - “ბიძინა ივანიშვილი - ქართული ოცნება”). პარლამენტის დარგობრივი ეკონომიკის და ეკონომიკური პოლიტიკის კომიტეტის თავმჯდომარის მოადგილე, კომიტეტთან არსებული საინოვაციო საბჭოს თავმჯდომარე.

თემურ მაისურაძე იყო 167 ნოვაციის და გამოგონების ავტორი. ნოვაციების და გამოგონებების 80 % დანერგილია მსოფლიოს მასშტაბით. ამით ის ერთეულ გამომგონებელთა შორის არის. თემურ მაისურაძის გამოგონებები დაპატენტებულია მსოფლიოს 150 ქვეყანაში.

1990-იან წლებში თემურ მაისურაძე თანამშრომლობდა NASA-ს სამეცნიერო ჯგუფთან. იყო რამდენიმე საერთაშორისო ორგანიზაციის ექსპერტი-მეცნიერი.

1980-90-იან წლებში თემურ მაისურაძე იყო მსხვილი მეწარმე და მეცენატი. მის სახელს უკავშირდება ბევრი სასიკეთო ქველმოქმედება საქართველოში. ბოლო პერიოდში ის იყო ბიზნეს-ადმინისტრირების დოქტორი, საქართველოს ტექნიკური უნივერსიტეტის ბუნებრივი კატასტროფების კვლევითი ცენტრისა და “Fab Lab” -ის ხელმძღვანელი.

თემურ მაისურაძის დაკრძალვა გაიმართება 9 მაისს, შაბათს სიონის ტაძრიდან. ქვეყნის წინაშე გაწეული განსაკუთრებული ღვაწლისთვის იგი დაიკრძალება მახათას მწერალთა და საზოგადო მოღვაწეთა პანთეონში.