გერმანიის ქრისტიან-დემოკრატიული კავშირის საპარლამენტო ფრაქციის ლიდერი მას შემდეგ გადადგა, რაც მშობელი სუროგაციის გზით გახდა

გერმანელი პოლიტიკოსი და კანცლერ ფრიდრიხ მერცის მოკავშირე, იენს შპანი ქრისტიან-დემოკრატიული კავშირის (CDU) საპარლამენტო ფრაქციის ლიდერის თანამდებობიდან გადადგა მას შემდეგ, რაც ის და მისი ქმარი მშობლები სუროგატი დედის მეშვეობით გახდნენ.

შპანი წარსულში თავად აკრიტიკებდა ამ პრაქტიკას, მისი პარტია კი სუროგაციას მტკიცედ ეწინააღმდეგება. გერმანიაში სუროგაცია კანონით აკრძალულია. ეს არის პოლიტიკა, რომლის შერბილებაზეც თავად იენს შპანმა თქვა უარი, როდესაც 2020 წელს ჯანდაცვის მინისტრის პოსტს იკავებდა. ამის გამო, მან და მისმა ქმარმა, დანიელ ფუნკემ სუროგატი დედის მომსახურებით აშშ-ში ისარგებლეს.

მიუხედავად იმისა, რომ 2015 წელს შპანი წერდა: „როგორც გეი კაცისთვის და ქრისტიანისთვის, ჩემთვის პიროვნულად ძალიან რთულია შევეგუო „დაქირავებული საშვილოსნოს“ იდეას“, ოთხშაბათს ის სწორედ ამ გზით გახდა მშობელი და გერმანულ გამოცემა Bild-ს განუცხადა: „გეორგი ჩვენი უდიდესი სიხარულია. ამ გრძნობის სიტყვებით გადმოცემა თითქმის შეუძლებელია“.

ამ განცხადებამ მყისიერი კრიტიკა გამოიწვია როგორც ქრისტიან-დემოკრატიული პარტიის შიგნით, ისე მის ფარგლებს გარეთ. ბევრმა შპანი თვალთმაქცობაში დაადანაშაულა.

„პოლიტიკოსები, რომლებიც სხვებისთვის ადგენენ სტანდარტებს, თავადაც ამ სტანდარტებით უნდა შეფასდნენ. თუ ეს ნდობა დაკარგულია, გადადგომა ერთადერთი ლოგიკური შედეგია“, - განუცხადა BBC-ის მარიონ როზინმა, თიურინგიის მხარის ქრისტიან-დემოკრატმა და „ქალთა კავშირის“ წევრმა.

1990 წლის „ემბრიონების დაცვის შესახებ“ კანონის თანახმად, გერმანიაში სუროგაცია 3 წლამდე თავისუფლების აღკვეთით ან ჯარიმით ისჯება, რის გამოც მრავალი გერმანული წყვილი სუროგაციას საზღვარგარეთ მიმართავს.