გერმანიის საგარეო საქმეთა მინისტრი: ჩვენ გვსურს უფრო ძლიერი ნატო, რომელშიც ევროპას უფრო დიდი როლი ექნება

შვედეთში ნატოს საგარეო საქმეთა მინისტრების შეხვედრის წინ, გერმანიის საგარეო საქმეთა მინისტრმა, იოჰან ვადეფულმა ხაზგასმით აღნიშნა ბერლინის მზადყოფნა, აიღოს მეტი პასუხისმგებლობა ნატოში.

„ჩვენი მიზანია ტვირთის განაწილების ახალი შეთანხმება, რომელიც ასახავს გერმანიისა და ევროპის ეკონომიკურ და სამხედრო პოტენციალს“, - განაცხადა მან ბერლინში, შვედეთში გამგზავრებამდე და დასძინა, რომ „გერმანია იღებს თავის ლიდერულ პასუხისმგებლობას“.

„ჩვენ გვსურს უფრო ძლიერი ნატო, რომელშიც ევროპას უფრო დიდი როლი ექნება“, - თქვა ვადეფულმა. „ამის მისაღწევად, ჩვენ გვინდა გავაერთიანოთ ჩვენი ინდუსტრიების შესაძლებლობები უფრო ინტენსიური თავდაცვითი თანამშრომლობის გზით“.

მინისტრმა ასევე დასძინა, რომ გერმანიას სურს რაც შეიძლება სწრაფად მიაღწიოს ნატოს მიერ დასახულ თავდაცვის ხარჯების 5%-იან მიზანს და გააძლიეროს საკუთარი თავდაცვისუნარიანობა.