გიორგი კაკაურიძე 2027 წლის ბიუჯეტის პროექტზე: 800 მლნ ლარზე მეტით გაზრდილია ჯანდაცვის მიმართულება, 400 მლნ ლარზე მეტით განათლების მიმართულება

ბიუჯეტი დაგეგმილია კონსერვატიულ პარამეტრებზე დაყრდნობით - განაცხადა საქართველოს ფინანსთა მინისტრის პირველმა მოადგილემ გიორგი კაკაურიძემ, 2027 წლის სახელმწიფო ბიუჯეტის პროექტზე საუბრისას.

მისი თქმით, პროექტით გათვალისწინებულია რამდენიმე მნიშვნელოვანი ახალი პროექტის დაწყება, მათ შორის არის თბილისის შემოვლითი გზის მონაკვეთები, თბილისი-რუსთავისა და ბათუმი-სარფის მიმართულებები.

„გათვალისწინებული გვაქვს 5%-იანი ეკონომიკური ზრდა. ვალი კვლავ კლებულობს და 31,6%-ის ფარგლებშია შენარჩუნებული. ჯამში, ნაერთი ბიუჯეტის პარამეტრებს თუ შევხედავთ, ჯამური ხარჯვითი ნაწილი 37,6 მლრდ ლარია. აქ აღსანიშნავია, რომ 800 მლნ ლარზე მეტით გაზრდილია ჯანდაცვის მიმართულება, 400 მლნ ლარზე მეტით - განათლების მიმართულება“, - განაცხადა კაკაურიძემ.

სახელმწიფო ბიუჯეტის 2027 წლის პროექტი დღეს პარლამენტის ბიუროს სხდომაზე დარეგისტრირდა.