გიორგი კახიანი: ახალი ადმინისტრაციის პირობებში ჩვენ ვხედავთ ძალიან პოზიტიურ დინამიკას, რაც არაერთ მოქმედებაში ჩანს. დარწმუნებული ვარ, რომ ამ პოზიტიური დინამიკის შემადგენელია მათ შორის ელჩის დანიშვნის გადაწყვეტილება

ახალი ადმინისტრაციის პირობებში ჩვენ ვხედავთ ძალიან პოზიტიურ დინამიკას, რაც არაერთ მოქმედებაში ჩანს. დარწმუნებული ვარ, რომ ამ პოზიტიური დინამიკის შემადგენელია მათ შორის ელჩის დანიშვნის გადაწყვეტილება, - განაცხადა „დღის ქრონიკაში“ პარლამენტის თავმჯდომარის მოადგილემ გიორგი კახიანმა საქართველოში აშშ-ის ელჩის მოვალეობის შემსრულებლად ემი დიაზის დანიშვნასთან დაკავშირებით.

მისი თქმით, საქართველოს ხელისუფლება მზადაა აშშ-სთან სტრატეგიული პარტნიორობის ურთიერთობების აღდგენისთვის.

„ძალიან კარგი და მისასალმებელია, რომ საქართველოში დაინიშნა აშშ-ის ელჩის მოვალეობის შემსრულებელი. სამწუხაროდ, კარგა ხნის განმავლობაში, მას შემდგომ, რაც წინა ელჩმა დატოვა თანამდებობა, აშშ-ს საქართველოში ელჩი არ ჰყავდა. ჩვენ არაერთხელ გვითქვამს, რომ ჩვენთვის შეერთებულ შტატებთან ურთიერთობა არის პრიორიტეტული და უმნიშვნელოვანესი. ჩვენ ამასთან დაკავშირებით მზაობაც განვაცხადეთ, რომ ის ურთიერთობები, რაც გვქონდა აშშ-სთან, სტრატეგიული პარტნიორობის ურთიერთობას ვგულისხმობ, უნდა აღვადგინოთ. სამწუხაროდ, წინა ადმინისტრაციის პირობებში ბევრი რამ გაკეთდა ისეთი, რომ ეს ურთიერთობები გართულდა, მაგრამ ახალი ადმინისტრაციის პირობებში ჩვენ ვხედავთ ძალიან პოზიტიურ დინამიკას, რაც არაერთ მოქმედებაში ჩანს. დარწმუნებული ვარ, რომ ამ პოზიტიური დინამიკის შემადგენელია მათ შორის ეს გადაწყვეტილება“,- აღნიშნა კახიანმა.