გიორგი კახიანი: ერთია, რა ხდება ამ რეზოლუციებში, რომლებიც სრულიად არაობიექტურ და არარსებულ ფაქტებს ეფუძნება და მეორეა რა ხდება ქვეყანაში
ერთია, რა ხდება ამ რეზოლუციებში, რომლებიც სრულიად არაობიექტურ და არარსებულ ფაქტებს ეფუძნება და მეორეა რა ხდება ქვეყანაში და ქვეყანაში რა ხდება, ეს ქართველმა ხალხმა უფრო კარგად იცის, ვიდრე მაგალითად საფრანგეთის პარლამენტის 68 წევრმა, რომელმაც რეზოლუციას დაუჭირა მხარი, - განაცხადა საქართველოს პარლამენტის თავმჯდომარის მოადგილე გიორგი კახიანმა საფრანგეთის პარლამენტის მიერ საქართველოს წინააღმდეგ მიღებულ რეზოლუციაში.
„დღის ქრონიკაში“ საუბრისას დეპუტატმა აღნიშნა, რომ საქართველოს აქვს გარკვეული წითელი ხაზები, რომელთა გადაკვეთაც საზოგადოებისთვის მიუღებელია.
„ჩვენ გვინდა ერთი რამ - ჩვენ გვინდა დიალოგი, ჩვენ მზად ვართ დიალოგისთვის და არაერთხელ გაგვიჟღერებია ასეთი რამ. ნებისმიერი ძალიან მარტივია უაპელაციოდ და შეპასუხების გარეშე კონკრეტული შეფასებები გააკეთო და რეზოლუციებში ასახო. მაგრამ როდესაც დიალოგზეა საუბარი, იქ პირისპირ უკვე სხვა ფორმატია და ასე მარტივად, დაუსაბუთებელ ბრალდებებს ვერავის წაუყენებ. ესეც არის ერთ-ერთი მიზეზი, რატომაც დიალოგი ამ დროის განმავლობაში ვერ შედგა“, - აღნიშნა კახიანმა.
მისივე თქმით, ასეთი რეზოლუციების უკან რადიკალური ოპოზიცია დგას.
„ყველანაირად ცდილობენ დააზიანონ ქვეყნის რეპუტაცია, ქვეყნის იმიჯი, რომ იქნებ ასეთ პროცესებში თავისთვის რაღაც ხელსაყრელი პოლიტიკური ნიადაგი გამონახონ. მეორე მხრივ, გარე აქტორებიც და მათი გარე პატრონები ცდილობენ, რომ ასეთი რეზოლუციებით მათ რაღაც პოლიტიკური მუხტი შესძინონ, მაგრამ თვითონაც კარგად ხვდებიან, რომ არანაირი რევოლუციური მუხტი ქვეყნის შიგნით არ არსებობს და ვერც იქნება ასეთი მუხტი, იმიტომ რომ ამის არანაირი წინაპირობა არ არსებობს“, - აცხადებს კახიანი.
საფრანგეთში, სალომე ზურაბიშვილის მონაწილეობით მოამზადეს და მიიღეს რეზოლუცია, რომლითაც ეროვნული ასამბლეა ითხოვს სანქციებს, ევროკავშირში გაწევრების გაყინვას და აკრიტიკებს მიღებულ კანონებს. საფრანგეთის 577-კაციან პარლამენტში, დოკუმენტის განხილვას 95 დეპუტატი ესწრებოდა, მის მიღებას მხარი 68-მ დაუჭირა, 22-მა ხმა წინააღმდეგ მისცა. სხდომას ესწრებოდა სალომე ზურაბიშვილიც.
