გიორგი კახიანი უზბეკეთის პრეზიდენტის საქართველოში ვიზიტზე: ნებისმიერი შესაძლებლობა, რომელიც ჩვენ გვაქვს და დაეხმარება ეკონომიკის განვითარებას, მაქსიმალურად უნდა გამოვიყენოთ და სწორედ ეს არის ჩვენი პოლიტიკა
ნებისმიერი შესაძლებლობა, რომელიც ჩვენ გვაქვს და დაეხმარება ეკონომიკის განვითარებას, მაქსიმალურად უნდა გამოვიყენოთ და სწორედ ეს არის ჩვენი პოლიტიკა, - განაცხადა გადაცემაში „დღის ქრონიკა“ საქართველოს პარლამენტის თავმჯდომარის მოადგილემ გიორგი კახიანმა უზბეკეთის პრეზიდენტის საქართველოში ვიზიტზე საუბრისას.
მისივე თქმით, ბოლო პერიოდში საზოგადოება თვალს ადევნებს იმ პროცესს, რომ საქართველო კიდევ უფრო აძლიერებს ცენტრალური აზიის ქვეყნებთან არსებულ ურთიერთობებს.
„ეს ყველაფერი იმაზე მიუთითებს, თუ რაოდენ დიდ მნიშვნელობას ვანიჭებთ ჩვენ ამ სახელმწიფოებთან ურთიერთობას. საზოგადოებამ უნდა იცოდეს, რომ როდესაც ცენტრალური აზიის ამ სახელმწიფოებზე ვსაუბრობთ , მათი ეკონომიკა ითვლის დაახლოებით 500 მილიარდ დოლარს და უდიდესი შესაძლებლობების მქონე სახელმწიფოებია. ამიტომ ამ ქვეყნებთან ეკონომიკური ურთიერთობების გაღრმავება არის ძალიან მნიშვნელოვანი.
როდესაც ვსაუბრობთ საქართველოს როლზე შუა დერეფნის განვითარებასთან დაკავშირებით, ამ ქვეყნებსაც უდიდესი მნიშვნელობა აქვს. ეს ყველაფერი კიდევ ერთხელ მიუთითებს იმაზე, რომ ჩვენ უნდა გამოვიყენოთ ყველა შესაძლებლობა, რომელიც გაგვაჩნია, რადგან ერთ-ერთი უმნიშვნელოვანესი ამოცანა, რომელიც ჩვენს წინაშე დგას, ეს არის ჩვენი მოსახლეობის კეთილდღეობის უზრუნველყოფა“, - აღნიშნა გიორგი კახიანმა.
იმედი
წყარო: imedinews.ge