გიორგი სოსიაშვილი რადიკალებზე: თავის დროზე, ძალიან დიდი ფული იშოვეს ქართველი ხალხის გაყიდვის ხარჯზე. საკუთარი სამშობლო მათ ბიზნესპროექტად ჰქონდათ გადაქცეული

თავის დროზე, მათ ძალიან დიდი ფული იშოვეს ქართველი ხალხის ხარჯზე, - განაცხადა გადაცემაში „დღის ქრონიკა“ განათლების, მეცნიერებისა და ახალგაზრდულ საქმეთა კომიტეტის თავმჯდომარის მოადგილემ, საპარლამენტო უმრავლესობის წევრმა გიორგი სოსიაშვილმა რადიკალებზე.

სოსიაშვილის თქმით, საკუთარი სამშობლო მათ ბიზნესპროექტად ჰქონდათ გადაქცეული.

„ძალიან დიდი ქონება დააგროვეს, ეს ფული იშოვეს ქართველი ხალხის გაყიდვის ხარჯზე. ჩვენი ქვეყნის ღალატის, საკუთარი სამშობლოს ტერიტორიების მტრისთვის ჩაბარების ხარჯზე. ასეთი უამრავი სიბინძურე გააკეთეს. ახლა, ბუნებრივია, მათ სურვილი აქვთ ამ სცენარებში ისევ ისე იყვნენ, როგორც მოქმედი პირები. არ დაკარგონ მათ თავიანთი მნიშვნელობა, ფუნქცია გარე პატრონებთან და რასაკვირველია, ამის გამო ხდება წამოძახებები, ცოდვების ერთმანეთზე. უნდათ, რომ საკუთარ თავზე უფრო მეტი ქულები მიიწერონ და გარე პატრონების წარმოსახვაში წარმოჩინდნენ როგორც საქმის მკეთებლები“, - აღნიშნა მან.

გიორგი სოსიაშვილის თქმითვე, რადიკალები დაცლილები არიან ყოველგვარი ძალისგან.

„მორალზე და ზნეობაზე ლაპარაკი აღარ მაქვს, მაგრამ საზოგადოებამაც უკვე დაინახა, კაციშვილი აღარავინ გამოდის. ხედავენ, რომ ესენი არიან ჩვეულებრივი, ქართველი ხალხის ხარჯზე გამდიდრებული თაღლითები, ქვეყნის უფსკრულში გადამჩეხი ხალხი“, - განაცხადა მან.