გიორგი ვოლსკი 4 ოქტომბრის საქმის ბრალდებულებზე: ეს არ არის ადამიანთა ჯგუფი, რომლებსაც სიკეთე უნდოდათ საკუთარი ქვეყნისთვის. მათი ამოცანა იყო იმ ცეცხლის, რაც ორბელიანის მოედანზე ვიხილეთ, მთელი საქართველოს მასშტაბით გადატანა

ვიღაცამ ძალიან ფრთიანი ფრაზა შემოისროლა საინფორმაციო სივრცეში - „ოქტომბრელები“ დაარქვა ამ ადამიანებს, მაგრამ ეს ძალიან უწყინარია იმასთან შედარებით, რის გაკეთებასაც ისინი ლამობდნენ, - განაცხადა გიორგი ვოლსკიმ 4 ოქტომბრის საქმეზე ბრალდებულებზე საუბრისას. პარლამენტის პირველი ვიცე-სპიკერის თქმით, ისინი არც მალავდნენ, რომ მათი მიზანი ორბელიანის მოედანზე გაჩენილი ცეცხლის მთელი ქვეყნის მასშტაბით გავრცელება იყო.

„ლოკალურად რაც ცეცხლი აინთო ორბელიანის მოედანზე, უნდოდათ, რომ მასობრივად ყოფილიყო საქართველოში. ამასთან დაკავშირებით არავითარი ორი აზრი არავის უნდა ჰქონდეს. ეს არ არის ადამიანთა ჯგუფი, რომლებსაც სიკეთე უნდოდათ საკუთარი ქვეყნისთვის. მათი ამოცანა იყო იმ ცეცხლის, რაც ორბელიანის მოედანზე ვიხილეთ, მთელი საქართველოს მასშტაბით გადატანა. არც დაუმალავთ ეს“, - ამბობს ვოლსკი.

საქალაქო სასამართლოში 4 ოქტომბრის საქმეზე ბრალდებულების პაატა ბურჭულაძის, მურთაზ ზოდელავას, ირაკლი ნადირაძის, პაატა მანჯგალაძის, ლაშა ბერიძის, ირაკლი შაიშმელაშვილისა და კიდევ ოთხი ადამიანის სასამართლო პროცესი მიმდინარეობს. ბრალდებულები დღევანდელ პროცესზე საბოლოო სიტყვის უფლებით ისარგებლებენ. შესაძლოა მოსამართლემ განაჩენი დღესვე გამოაცხადოს.