გორის ინციდენტის დროს დაზარალებული პოლიციელის მკურნალი ექიმი: შემოყვანილია თავის ტრავმით. თქვა, რომ ბლაგვი საგანი აქვს მოხვედრილი, ჩაუტარდა შესაბამისი სტაციონარული მომსახურება, ამჟამად იმყოფება სტაციონარულ მკურნალობაზე
გორის ინციდენტის დროს დაზარალებული პოლიციელის მდგომარეობა დამაკმაყოფილებელია.
როგორც „ქრონიკას“ გორის სამხედრო ჰოსპიტლის ქირურგიული სამსახურის უფროსმა გიორგი ჯავახიშვილმა განუცხადა, დაზარალებულს თავის არეში ბლაგვი საგნით მიყენებული დაზიანება აქვს.
„ჩვენთან სტაციონარში არის მოთავსებული 21 წლის მამაკაცი, გუშინ არის შემოყვანილი თავის ტრავმით. ჩაუტარდა შესაბამისი სტაციონარული მომსახურება, შესაბამისი კვლევები. ამჟამად იმყოფება სტაციონარულ მკურნალობაზე. მდგომარეობა სტაბილურია, კონტაქტურია. თვითონ ასე თქვა, რომ ბლაგვი საგანი აქვს მოხვედრილი. საშუალო სიმძიმის ტრავმა არის. ხვალისთვის კიდევ ერთხელ გადაკონტროლდება ყველაფერი და შემდეგ გადაწყდება შემდგომ, როგორ ვიმოქმედებთ. დღეს დარჩება სტაციონარში“, - განაცხადა გიორგი ჯავახიშვილმა.
პროკურატურამ პოლიციელების მიერ სამსახურებრივი უფლებამოსილების ძალადობით გადამეტების ფაქტზე 6 პირი დააკავა.
ადვოკატის ინფორმაციით, სამართალდამცველების მიერ დაკავებული პროკურატურის დადგენილების საფუძველზე გათავისუფლდა.
საქართველოს პროკურატურამ მომხდარის ამსახველი კადრების გავრცელებისთანავე გამოძიება ძალადობით უფლებამოსილების სავარაუდო გადამეტების მუხლით დაიწყო.
როგორც შს მინისტრის მოადგილემ განაცხადა, აღნიშნული ინციდენტის დროს დაზიანება მიიღო პოლიციელმაც.
იმედი
წყარო: imedinews.ge