გურამ მაჭარაშვილი ოპოზიციურ ალიანსზე: ერთმანეთში არარსებულს ვერ იყოფენ, ხომ წარმოგიდგენიათ, ამ ხალხს ძალაუფლება რომ ჰქონდეს, რა დღეში ჩავარდებიან

„ნაცმოძრაობის პრინციპი, რომ ხან გაერთიანდებიან, ხან ცხრა ნაწილად დაიშლებიან, მერე შვიდ ნაწილად შეერთდებიან, ეს მათივე ამომრჩეველსაც მობეზრდა, - ასე აფასებს „ხალხის ძალის“ აღმასრულებელი მდივანი გურამ მაჭარაშვილი ოპოზიციურ ალიანსში მიმდინარე პროცესებს.

მისი თქმით, ისინი ერთმანეთში არ არსებულ ძალაუფლებასაც კი ვერ იყოფენ.

„ამიტომ აღარ არის ეს საინტერესო - ალიანს დაარქმევ, ფანჩატურს, თუ შარლ მიშელს, ეს არ შველის. ერთმანეთში არარსებულს ვერ იყოფენ, ძალაუფლება არ აქვთ და ვერ იყოფენ და ხომ წარმოგიდგენიათ, ერთი წამითაც ვინმემ რომ დაუშვას, რომ ამ ხალხს ძალაუფლება ჰქონდეს, რა დღეში ჩავარდებიან“, - აღნიშნა მაჭარაშვილმა.

ოპოზიციურ ალიანსში ისევ დაპირისპირებაა. „ფედერალისტები“ „ნაციონალურ მოძრაობას“ ალიანსის წესების დარღვევაში ადანაშაულებენ და ამბობენ, რომ ისინი ალიანსიდან თავს თავად ირიცხავენ. ამის პასუხად „ნაციონალურ მოძრაობაში“ ამბობენ, რომ მათი ყოფნა ალიანსში არავის გადასაწყვეტი არ არის.