ღვინის ეროვნული დღის ფარგლებში საქართველოში საერთაშორისო ღვინის ტურები გაიმართა
ღვინის ეროვნული სააგენტოს ორგანიზებით, საქართველოში ღვინის ეროვნული დღის ფარგლებში, აშშ-დან, გერმანიიდან და აზიის ქვეყნებიდან (ჩინეთი, სინგაპური, ჰონგ-კონგი) ჩამოსული ღვინის ექსპერტებისა და მედიის წარმომადგენლებისთვის ღვინის ტურები გაიმართა. მონაწილეთა შორის იყვნენ ღვინის მაგისტრები დებრა მეიბურგი, ლისა პეროტი და კონსტანტინ ბაუმი.
ტურის პროგრამა მოიცავდა ვიზიტებს საქართველოს მეღვინეობის რეგიონებში. სტუმრები იმყოფებოდნენ იმერეთსა და კახეთში მდებარე ღვინის მარნებსა და კომპანიებში, სადაც ადგილზე გაეცნენ ქართული ღვინის წარმოების ტრადიციულ მეთოდებს და დააგემოვნეს სხვადასხვა სახეობის ღვინო.
ღვინის პროფესიონალებმა და მედიის წარმომადგენლებმა ვიზიტის ფარგლებში მონაწილეობა მიიღეს ღვინის ეროვნული დღისადმი მიძღვნილ კონფერენციაში, დაესწრნენ ქართული ღვინის დეგუსტაციას გუდიაშვილის მოედანზე და ასევე საზეიმო გალა-კონცერტს.
ღვინის ეროვნული დღე, რომელიც ყოველწლიურად 8 მაისს აღინიშნება, საქართველოს მთავრობის გადაწყვეტილებითა და ღვინის ეროვნული სააგენტოს ინიციატივით დაწესდა. მისი მიზანია ქართული ღვინის, როგორც ქვეყნის იდენტობისა და კულტურული მემკვიდრეობის ერთ-ერთი უმნიშვნელოვანესი ნაწილის, მრავალსაუკუნოვანი მეღვინეობის ტრადიციების საერთაშორისო დონეზე წარმოჩენა და პოპულარიზაცია.
იმედი
წყარო: imedinews.ge