იან პრაუდი: თუ გააკრიტიკებ იმას, რომ 21 მილიარდ ფუნტს ურიცხავს ბრიტანეთი უკრაინას ომისთვის, რომელიც ანგრევს ქვეყანას და უკრაინა ამ ომს ვერ მოიგებს, დაგადანაშაულებენ, რომ კრემლის რუპორი ხარ. შეიძლება დაგაპატიმრონ და კონტრტერორიზმის პოლიციამ დაგკითხოს რადიკალური იდეებისთვის. ეს ყველაფერი გვაქცევს ახალ საბჭოთა კავშირად

თუ გააკრიტიკებ იმას, რომ 21 მილიარდ ფუნტს ურიცხავს ბრიტანეთი უკრაინას ომისთვის, რომელიც ანგრევს ქვეყანას და უკრაინა ამ ომს ვერ მოიგებს, დაუყოვნებლივ დაგადანაშაულებენ იმისთვის, რომ კრემლის რუპორი ხარ. შეიძლება დაგაპატიმრონ ქვეყანაში რომ ჩახვალ და კონტრტერორიზმის პოლიციამ დაგკითხოს რადიკალური იდეებისთვის, - განაცხადა გადაცემაში „იმედი LIVE“ ბრიტანელმა დიპლომატმა, გლობალური კრიზისების მართვის ექსპერტმა იან პრაუდმა კითხვაზე: თუ რა მდგომარეობაა სიტყვისა და გამოხატვის თავისუფლების კუთხით დიდ ბრიტანეთსა და ევროკავშირში.

მან მაგალითისთვის პროფესორ რიჩარდ საკორდის შემთხვევა მოიყვანა, რომელიც მისი თქმით, 4 საათი იმყოფებოდა დაკითხვაზე იმის გამო, რომ დაწერა აკადემიური წერილი აღმოსავლეთ ევროპაზე.

იან პრაუდის განცხადებით, ევროკავშირი და ბრიტანეთი ცდილობენ დაამკვიდრონ ნარატივი, რომ საჭიროა რუსეთის დამარცხება, ჩინეთზე ზეწოლა და არ დაუშვან განსხვავებული აზრი.

„ყველაფერი ეს ჩვენ [დიდ ბრიტანეთს] გვაქცევს ახალ საბჭოთა კავშირად“, - განაცხადა იან პრაუდმა.