იაპონური მედია: რუსული რაკეტებისა და დრონების დაახლოებით 90% იაპონური წარმოების კომპონენტებს შეიცავს

რუსული ფრთოსანი და ბალისტიკური რაკეტების, ასევე უპილოტო საფრენი აპარატების დაახლოებით 90%-ში იაპონური კომპანიების მიერ წარმოებული ელექტრონული კომპონენტებია გამოყენებული. ინფორმაციას Kyodo News-ი უკრაინის პრეზიდენტის ვოლოდიმირ ზელენსკის სანქციების პოლიტიკის საკითხებში წარმომადგენელზე ვლადისლავ ვლასიუკზე დაყრდნობით ავრცელებს.

ვლასიუკის თქმით, იარაღში აღმოჩენილი კომპონენტების უმეტესობა იაპონიაში სამოქალაქო დანიშნულებით იყიდებოდა. Kyodo News-ის შეფასებით, რუსეთი იყენებს ფართო მოხმარების პროდუქციას, რომლის ექსპორტის კონტროლი სანქციების პირობებში რთულია.

გამოცემის ინფორმაციით, უკრაინის მთავრობის შიდა დოკუმენტებზე დაყრდნობით, რუსულ Х-101 ტიპის ფრთოსან რაკეტებში გამოყენებულია იაპონიის წამყვანი ნახევარგამტარების მწარმოებლებისა და სხვა მსხვილი ელექტრონიკის კომპანიების კომპონენტები.

Kyodo News-ის ჟურნალისტები დაუკავშირდნენ 13 იაპონურ კომპანიას, რომელთა კომპონენტებიც რუსულ რაკეტებსა და დრონებში აღმოაჩინეს. ხუთმა კომპანიამ კომპონენტების წარმომავლობის დადასტურება ვერ შეძლო და მიზეზად ინფორმაციის სიმწირე დაასახელა. ერთ-ერთმა მწარმოებელმა არ გამორიცხა, რომ მისი პროდუქცია სხვა დანიშნულებით გამოიყენეს, კიდევ ერთმა კი განაცხადა, რომ იდენტიფიცირებული კომპონენტი სხვა კომპანიის წარმოებული იყო. დანარჩენ ექვს კომპანიას ჟურნალისტების კითხვებზე პასუხი არ გაუცია.