ირაკლი გოგავა: ხელისუფლება სწორს იმას აკეთებს, რომ საინვესტიციო პორტფელების მოსაზიდად ჩადის ისეთ ცენტრებში, სადაც დიდძალი კაპიტალია, ვინაიდან ვიცით, რომ ევროკავშირიდან წამოსულ ფულს ვალდებულებები ახლავს

პოლიტოლოგმა, ირაკლი გოგავამ გადაცემა „დღის ქრონიკაში“ სინგაპურში საქართველოს-პრემიერ მინისტრისა და მთავრობის წევრების ვიზიტი შეაფასა და ასევე, პარტნიორობის გაღრმავების შემთხვევაში ქვეყნისთვის მოსალოდნელ ეკონომიკურ სარგებელზეც ისაუბრა.

მისივე თქმით, თვალში საცემია, რომ ქვეყნის მთავრობა ტრადიციული ფინანსური ცენტრების გარდა, ყურადღებას აქცევს სპარსეთის ყურის ქვეყნებს, სადაც დიდძალი კაპიტალია და ასევე სინგაპურს.

„სინგაპურის საფონდო ბირჟა 800 მლრდ დოლარის კაპიტალიზაციისა, ანუ იქ დიდი ფინანსები ტრიალებს. გარდა ამისა, სინგაპურის საბანკო სისტემა 350-360 მლრდ დოლარის კაპიტალიზაციით გამოირჩევა და ვფიქრობ, რომ სინგაპურიდან საინვესტიციო პორტფელების წამოღება გარკვეულ პროექტებზე სახელმწიფოსთვის საინტერესოა და შესაძლებელია.

გარდა ამისა, სინგაპური ყოველწლიურად გადაამუშავებს 622მლნ ტონა ტვირთს. რა თქმა უნდა, დიდი ნაწილი ზღვით გაიგზავნება, მაგრამ სახმელეთო ნაწილიც აქვთ. სინგაპურიდან საკონტეინერო, სახმელეთო გადაზიდვების ნაწილის წამოღებაც კი ჩვენთვის სერიოზული პლუსი იქნება“, - განაცხადა ირაკლი გოგავამ.

მისივე თქმით, ხელისუფლება სწორად მოქმედებს, რომ ჩადის ისეთ ფინანსურ ცენტრებში, სადაც დიდძალი კაპიტალია თავმოყრილი.

„ხელისუფლება სწორს იმას აკეთებს, რომ საინვესტიციო პორტფელების მოზიდვისთვის ჩადის ისეთ ცენტრებში, სადაც დიდძალი კაპიტალი, დიდძალი ფულია, ვინაიდან ჩვენ ვიცით, რომ ევროკავშირიდან წამოსულ ფულს ახლავს ვალდებულებები, ის ვალდებულებები, რომლებიც საზოგადოებას, მოაზროვნე ნაწილს არ მოგვწონს და ხელისუფლებაც ვერ მიიღებს ამას, რადგან ქართული საზოგადოება წინააღმდეგია - სხვადასხვა დღის წესრიგი აქვთ იქ - ულტრალიბერალური და ასე შემდეგ.

შესაბამისად, მოზიდვა ისეთი კაპიტალის, რომელსაც არ მოჰყვება პოლიტიკური, მორალური, ზნეობრივი, თუ იდეოლოგიური ვალდებულებები ამ პრიორიტეტს ვხედავთ და ჩემი შეფასებით, სწორი ნაბიჯია“, - განაცხადა გოგავამ.