ირაკლი ქადაგიშვილი: ევროკავშირის დამოკიდებულებამ საქართველოში დემოკრატიას არანაირი მხარდაჭერა და წინსვლა არ მოუტანა, პირიქით, მათი ქმედებებით საქართველოში დემოკრატიის გარკვეული ფუნქციონირება შეფერხებამდეც მიიყვანა

ევროკავშირში საბოლოო ჯამში წინ წამოიწევს სახელმწიფოთა ინტერესები და ეს იმოქმედებს ევროკავშირის პოლიტიკაზეც. ის დამოკიდებულება, რაც ჰქონდა ბოლო პერიოდში, განსაკუთრებით უკრაინაში რუსეთის შეჭრის შემდეგ ევროკავშირს საქართველოსთან მიმართ, აღმოჩნდა აბსოლუტურად კონტრპროდუქტიული ყველა მიმართულებით, - განაცხადა გადაცემაში „დღის ქრონიკა“ პარლამენტის რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა.

მისივე თქმით, დემოკრატიაზე როცა საუბრობს ევროკავშირი, მათმა დამოკიდებულებამ საქართველოში დემოკრატიას არანაირი მხარდაჭერა და წინსვლა არ მოუტანა, პირიქით, მათი ქმედებებით საქართველოში დემოკრატიის გარკვეული ფუნქციონირება შეფერხებამდეც მიიყვანა.

„ის, რომ პარლამენტის არჩევნები უგულებელყვეს და ამის დამადასტურებელი რაიმე ობიექტური არგუმენტი და მტკიცებულება არ გააჩნიათ, ამით დემოკრატიის განვითარებას ხელი შეუწყვეს თუ დააზიანეს?, ადგილობრივი თვითმმართველობის არჩევნებში პარტიების დიდმა ნაწილმა მონაწილეობა არ მიიღო, ამით დემოკრატიას ხელი შეუწყვეს თუ დააზიანეს?, აღარაფერს ვამბობ იმ პრაქტიკულ თემებზე, რაც დღეს ევროპისთვის უაღრესად მნიშვნელოვანია და ამ კუთხით მათთვის საქართველოსთან თანამშრომლობა აუცილებელია.

ვერ შედგება ეს პოლიტიკა საქართველოს გარეშე, არა მხოლოდ იმიტომ, რომ გეოგრაფიულად ვართ ასეთი ქვეყანა, არამედ იმიტომ, რომ სახელმწიფოებრივად ვართ დღეს იმ დონის სახელმწიფო, რომელთანაც თანამშრომლობა ყველასთვის მნიშვნელოვანია. პოლიტიკური რიტორიკა დროთა განმავლობაში შეიცვლება და რეალური თანამშრომლობის დრო მოვა“, - აღნიშნა ირაკლი ქადაგიშვილმა.