ირაკლი ქადაგიშვილი: ყოველი წელი საქართველოს დამოუკიდებლობისა, ეს არის ის სიხარული, რომელიც არასდროს განელდება

ყოველი წელი საქართველოს დამოუკიდებლობისა, ეს არის ის სიხარული, რომელიც არასდროს განელდება, - განუცხადა „ქრონიკას“ რეგიონული პოლიტიკისა და თვითმმართველობის საპარლამენტო კომიტეტის თავმჯდომარემ, ირაკლი ქადაგიშვილმა თავისუფლების მოედანზე, სადაც საქართველოს დამოუკიდებლობის დღისადმი მიძღვნილი საზეიმო ღონისძიებები იმართება.

ქადაგიშვილის თქმით, წლევანდელი წელი გამორჩეულია იმიტომ, რომ დღევანდელ ზეიმსა და დღესასწაულს ემთხვევა საქართველოს გაქრისტიანების 1700 წელი.

„რა თქმა უნდა, ეს არის სიმბოლური იმიტომ, რომ საქართველოს თავისუფლება, დამოუკიდებლობა, ქრისტიანობა, ჩვენი ერი და ეკლესია ყოველთვის განუყოფელნი იყვნენ ჩვენი სამშობლოსთვის, ჩვენი ქვეყნისთვის ბრძოლაში. დღეს ეს ერთობა სახეზეა, დღეს ხალხი, ეკლესია, საზოგადოება, ხელისუფლება - ყველანი აღვნიშნავთ საქართველოს დამოუკიდებლობის დღეს“, - აღნიშნა მან.