ირაკლი ქადაგიშვილი ოპოზიციაზე: მათ არ გააჩნიათ ერთიანი ხედვა, პლატფორმა, და მით უმეტეს, პოზიტიური დღის წესრიგი საქართველოსთან მიმართებაში. უკვე წლებია, ამ ნეგატიური დღის წესრიგით მოქმედებენ და ეს აისახება მათ პირად ურთიერთობებში

დაპირისპირება მიუთითებს იმაზე, რომ მათ არ გააჩნიათ ერთიანი ხედვა, პლატფორმა, და მით უმეტეს, პოზიტიური დღის წესრიგი საქართველოსთან მიმართებაში. უკვე წლებია, ამ ნეგატიური დღის წესრიგით მოქმედებენ და ბუნებრივია, ეს აისახება მათ პირად ურთიერთობებში”, - განაცხადა პარლამენტის რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა ოპოზიციაში არსებულ დაპირისპირებაზე.

მისი თქმით, ოპოზიციის ერთადერთი მიზანი საქართველოს დაზიანებაა.

„მათ ერთადერთი მიზანი აქვთ, რომ იქნებ, რამენაირად გარედან საქართველო დააზიანონ სანქციით ან რაიმე ამგვარი ქმედებით. ის, რომ ერიდებიან მათ შორის, მედიის დაშვებას მათ შეკრებებზე, მიუთითებს, რომ ეს შეკრებები მწირია და შინაარსიც არასახარბიელოა იმისთვის, რომ ფართო საზოგადოებამ იცოდეს”, - განაცხადა ირაკლი ქადაგიშვილმა.

ოპოზიციაში ისევ დაპირისპირებაა. ოპოზიციური ალიანსის ბოლო ორ შეხვედრას „ნაციონალური მოძრაობა“ არ დასწრებია. „ფედერალისტები“ „ნაციონალურ მოძრაობას“ ალიანსის წესების დარღვევაში ადანაშაულებენ და ამბობენ, რომ ისინი ალიანსიდან თავს თავად ირიცხავენ. ამის პასუხად „ნაციონალურ მოძრაობაში“ ამბობენ, რომ ალიანსში მათი ყოფნა ჩერგოლეიშვილის გადასაწყვეტი არ არის.