ირაკლი ზარქუა: რაც დღეს გერმანიას სჭირს, ეს არის გერმანიის კანცლერის, მერცის პოლიტიკის პირდაპირი დამსახურება. როდესაც უცხო ქვეყნის ინტერესებს ატარებ, მერე დაგემართება ის, რაც დაემართა - არჩევნები მოახლოებულია და ვინც პოლიტიკური კონკურენტები არიან, თურმე, უნდა დააჭერინონ ან საერთოდ აკრძალონ

გერმანიაში საქსონია-ანჰალტის მიწაზე დაგეგმილ მნიშვნელოვან არჩევნებამდე ერთი კვირით ადრე ქვეყნის თავდაცვის მინისტრმა მემარჯვენე პარტიის - „ალტერნატივა გერმანიისთვის“ - AfD-ს ზოგიერთი განყოფილების აკრძალვა მოითხოვა. შექმნილ ვითარებას თბილისში აფასებენ.

„ის, რაც დღეს გერმანიას სჭირს, ეს არის გერმანიის კანცლერის, მერცის პოლიტიკის პირდაპირი დამსახურება. როდესაც უცხო ქვეყნის ინტერესებს ატარებ, მერე დაგემართება ის, რაც დაემართა. დღეს მაკრონთან ერთად ყველაზე დაბალი რეიტინგი აქვს ევროპის ერთ-ერთ წამყვან და ყველაზე ძლიერ სახელმწიფოს - გერმანიას. და ახლა რა მოიფიქრეს - არჩევნები მოახლოებულია და ვინც პოლიტიკური კონკურენტები არიან, თურმე, უნდა დააჭერინონ ან საერთოდ აკრძალონ. ეს არის მათი ხელწერა და მიდგომა - აქ დემოკრატია უკვე არავის აინტერესებს და არავის ახსოვს“, - განაცხადა დიასპორის საპარლამენტო კომიტეტის თავმჯდომარემ ირაკლი ზარქუამ.

როგორც ცნობილია, Politico წერს, რომ კანცლერის ფრიდრიხ მერცის პარტია მომავალ რეგიონულ არჩევნებზე მარცხდება, სოციოლოგიური კვლევებით AfD-ს 42%-იანი მხარდაჭერა აქვს, რაც ორჯერ აღემატება ქრისტიან-დემოკრატების რეიტინგს.

მზარდი პოლიტიკური პოლარიზაციის პირობებში იზრდება რეიტინგის სათავეში მყოფი პარტიის წევრებსა და ინფრასტრუქტურაზე თავდასხმის ფაქტები. ქალაქ ბად-კროიცნახში AfD-ს საინფორმაციო კარავს და იქ შეკრებილ ხალხს უცნობი ქიმიური სითხე შეასხეს. დაშავდა 9 ადამიანი. არჩევნების მოახლოებასთან ერთად AfD-ს ფრიდრიხ მერციც აკრიტიკებს.