ირანის სამხედრო სარდლობა: აშშ-ს არ მივცემთ უფლებას, ჰორმუზის სრუტის მართვაში ჩაერიოს, რეგიონის ქვეყნებს კი ვაფრთხილებთ, რომ ამერიკულ ძალებთან ნებისმიერი თანამშრომლობა ირანის სუვერენიტეტის წინააღმდეგ მიმართულ საომარ აქტად იქნება აღქმული

ირანი შეერთებულ შტატებს უფლებას არ მისცემს ჰორმუზის სრუტის მართვაში ჩაერიოს, - აცხადებს ირანის სამხედრო სარდლობა და აღნიშნავს, რომ ამერიკული ძალების ნებისმიერ მცდელობას, ირანის მიერ დადგენილი მარშრუტის გვერდის ავლით გაატარონ გემები, გადამწყვეტი პასუხი გაეცემა.

„აშშ-ის ავანტიურისტული და მტრული ქმედებები, რომელიც ჰორმუზის სრუტის მართვაში ჩარევას ისახავს მიზნად, რეგიონის უსაფრთხოებას, საერთაშორისო ვაჭრობას, ასევე სანავთობო ტანკერებისა და სატვირთო გემების გატარებას ემუქრება. აქედან გამომდინარე ვაცხადებთ, რომ არ მივცემთ უფლებას აშშ-ს, ჰორმუზის სრუტის მართვაში ჩაერიოს. ირანის შეიარაღებული ძალები დადგენილი მარშრუტის გვერდის ავლით ნაოსნობას აღკვეთენ. რეგიონის ქვეყნებს კი ვაფრთხილებთ, რომ ამერიკულ ძალებთან ნებისმიერი თანამშრომლობა და ხელის შეწყობა ირანის სუვერენიტეტის წინააღმდეგ მიმართულ საომარ აქტად იქნება აღქმული“, - აცხადებს ირანის სამხედრო სარდლობა.