ირანმა და აშშ-მა სპარსეთის ყურეში საჰაერო დარტყმების ახალი ტალღა განახორციელეს

აშშ-მა ირანზე ახალი დარტყმები განახორციელა, თეირანმა კი საპასუხო ნაბიჯების შესახებ განაცხადა. ამერიკელმა სამხედროებმა ირანში, გორუკის რაიონსა და კუნძულ ქეშმზე რადარებსა და უპილოტო საფრენი აპარატების მართვის პუნქტებზე მიიტანეს იერიში.

აშშ-ის შეიარაღებული ძალების ცენტრალური სარდლობის (CENTCOM) ცნობით, ეს იყო პასუხი „ირანის აგრესიულ ქმედებებზე, მათ შორის საერთაშორისო წყლებში მყოფი ამერიკული უპილოტო საფრენი აპარატის, MQ-1-ის ჩამოგდებაზე“.

„აშშ-ის გამანადგურებლებმა ოპერატიულად მოახდინეს რეაგირება და გაანადგურეს ირანის საჰაერო თავდაცვის საშუალებები, სახმელეთო მართვის სადგური და ორი თავდამსხმელი დრონი-კამიკაძე, რომლებიც აშკარა საფრთხეს უქმნიდნენ რეგიონულ წყლებში ტრანზიტით მოძრავ გემებს. ამერიკელ სამხედროებს შორის არავინ დაშავებულა“, - განმარტეს CENTCOM-ში.

თავის მხრივ, ირანის „ისლამური რევოლუციის გუშაგთა კორპუსმა“ საპასუხო დარტყმის შესახებ განაცხადა. ირანული სააგენტო Mehr-ის ინფორმაციით, ამერიკელმა სამხედროებმა კუნძულ სირიკზე მდებარე კავშირგაბმულობის კოშკურაზე მიიტანეს იერიში, რის შემდეგაც „გუშაგთა კორპუსის“ ძალებმა „დაუყოვნებლივ მიაყენეს დარტყმა იმ ამერიკულ ავიაბაზას, საიდანაც თავდასხმა განხორციელდა“.

აშშ და ირანი ოფიციალურად ზავის რეჟიმში იმყოფებიან და მხარეები ომის დასრულების შესახებ მოლაპარაკებებს აწარმოებენ.