ირანში განაცხადეს, რომ ისრაელზე დარტყმებს წყვეტენ, თუმცა ლიბანზე თავდასხმის შემთხვევაში იერიშს განაახლებენ

ირანის უმაღლესმა სამხედრო სარდლობამ ისრაელის წინააღმდეგ შეიარაღებული ძალების ოპერაციების შეწყვეტის შესახებ განაცხადა.

თუმცა, ამავე განცხადებაშია გაფრთხილება იმის შესახებ, რომ თუ თავდასხმები გაგრძელდება, „მათ შორის სამხრეთ ლიბანზეც“, ირანი უპასუხებს „უფრო მკაცრად და ძლიერად, ვიდრე ადრე“.

თეირანში აცხადებენ, რომ ლიბანში ცეცხლის შეწყვეტას ირანთან ცეცხლის შეწყვეტის ნაწილად განიხილავენ.

კვირას ისრაელმა ბეირუთის სამხრეთით „ჰეზბოლას“ სამიზნეებზე დარტყმების შესახებ განაცხადა, რასაც ირანის მხრიდან ისრაელის მიმართულებით დარტყმები მოჰყვა. შემდეგ კი ისრაელმა ირანის ტერიტორიაზე საპასუხო დარტყმა მიიტანა. მხარეებს ცეცხლის დაუყოვნებლივ შეწყვეტისკენ დონალდ ტრამპმა მოუწოდა.